Li Stokholmê li dor 5000 kurdîstanî beşdarî pîrozkirina cejna Newrozê bûn:

NEWROZA KERKÛKÊ

STOKHOLM-20/03/2005-Kurdên Stokholmê û derdorê wê li salona mezin ya Solnayê cejna xwe ya netewî bi coş û şayiyeke mezin pîroz kirin.Cejna Newrozê, ya îsal bi navê "Newroza Kerkûkê" û bi hevkariya Federasyona Komeleyên Kurdistanê li Swêdê û Komela Dostên Kerkûkê hatibû organîzekrin. Kurdên ji çar aliyê Kurdistanê bi hestekî xurt, bi şewq û hêvîyeke mezin sersala xwe pîroz kirin. Deng û basên ku ji başûrê welat dihatin bi xwe ra hêvî dilxweşîyên nû dianîn. Berpirsên hukumeta herêma Kurdistana Başûr, Komîteya Hevkarî, Federasyona Kurdan, Platforma Kurdên Ewrûpa, Komeleya Dostên Kerkûkê û yên din di axiftinên xwe de pêşketina di warê sîyasî û civakî de li ser rola hevkariya hêzên netewî sekinîn û xasima hevkariya herdu partiyên sereke YNK û PDKê pesinandin.
Sefîrê Iraqê birêz Ehmed Bamernî jî beşdarî şahiya Newrozê bû û heta nîvê şevê di nav hevwelatiyên xwe de cejna Newrozê pîroz kir.Wek her car swêdiyên dostên kurdan, nûnerên partiyên siyasî yên swêdî li wir amade bûn, piştgirî û dostaniya xwe nîşan dan.
Bi bêşdariya hunermendan wek; Ejder, Ayad, Rojîn, Pirseng, M. Raûf Akrayî û Azad Feqe, bernameyeke çandî ya zengîn hat pêşkêşkirin.