STOKHOLM 19-03/2004- Îro li Stokholmê şahiyeke Newrozê ya xas ji bo zarokan hat lidarxistin. Ev cara yekemîn e kurdên Stokholmê şahiyeke newrozê ya taybeti ji bo zarokan çêdikin.

Aheng bi hevkariya Federasyona Komelên Kurdistan û mamosteyên kurdî yên belediya Stokholmê hatibû organîzekirin. Herçend ev cara yekê bû jî, beşdariyeke mezin pêkhatibû, gelek dê û bavan zarokên xwe anîbûn şahiyê. Di salona mezin de şûna rûniştinê nemabû, gelek kesan li ser piyan bername temaşekirin.

Serokê Federasyona Komelên Kurdistanê Keya Îzol û perpirsiyara grûba mamosteyên kurd Nazê Xan silavên xêrhatinê li mêvanan kirin û ji bo ku tradisyoneke weha li Stokholmê bi cî bibe dehwa piştgirîyê li dê û bavan kirin û xweşhaliya mamosteyên kurdî ji bo beşdariya wan anîn zimên. Piştî ku tîpên cuda-cuda yên stran û govendê hunerên xwe pêşkêş kirin û di salonê de li zarokan şîranî û vexwarin hat belavkirin. Hunermenda hezkirî Leyla Ferîqî jî ji bo zarokan û dêûbavên wan çend goranî gotin. Şahiya Newroza biçûkan temam bû, vê carê li derva (her li taxa Tensta ku hersal agirê Newrozê lê tê vêxistin) li çolê li dor agirê Newrozê kombûn û pîrozkirina cejna Newrozê domandin.