”Pêşangeha pirtûkên kurdî ya duwemîn” pêkhat. Pîroz be!

Di navbera rojên 28-30-yê Gulanê de li bajarê Kolnê pêşangeha pirtûkên kurdî hatibû vekirin. Li dor deh weşanxaneyên kurdî tê de beşdar bûn. Her yekî ji wan, her pirtûkeke xwe wek kevirekî dîwarê avahiyeke pîroz, wek kevirê xîmê sûreke mezin ya qelayeke ziman û çanda kurdî anîbûn wir û nîşandan. Wana wê bi hevra ew sûra mezin avabikirana. Û kirin jî! Bi rik û inyat! Bi hêvî û berxwedan! Dost pê dilşa, dijmin pê dilreş bûn.

Di nava van sê rojan de, gelek çalakiyên manedar û hêja pêkhatin. Semîner, xwendina helbestan, îmzekirina pirtûkan ji aliyê nivîskaran ve, pêşkêşkirina xelatên KOMKARê ji weşanxanên kurd re û gelek tiştên din.. Xwezî îmkanên ragihandina bi riya TV hebûya, da ew dîmen, ew gotin, ew ked, ew xizne, ew hezkirin û evîna ji bo ziman û çanda bindest û birîndar nîşanî sedhezaran bida!.. Lê kanê?

Bi rastî, KOMKARê digel weşanxane û rewþenbîrên kurdan çalakiyeke kulturî (û siyasî) ya hêja pêkanîbûn, lê mixabin, kêm ji kurdan pê haydar bûn. Çi li Almanya çi jî li hundurê welêt, gelê me bi piranî ji xebat û hewldanên weha yên rewşenbîr, nivîskar, weşanxane û saziyên kurda agadar nabe. Heyf û mixabin.

Ev cara duwemîn bû ku li Almanyayê pêşangeha pirtûkên kurdî hatibû vekirin. Par  hewldanên dîplomatîk yên sefaretxana tirkan ji bo qedexekirina pêşangehê feyda nedabû wan, lewma îsal berdestkên xwe ”apocî” şandibûn ku pêşangehê belav bikin. Di qirka wan da ma!

Mala KOMKARê ava! Destê nivîskarên me, weşanxaneyên me û hemû xemxur û zehmetkêşên ziman û çanda kurdî xweş be! Wan li Kolnê bi hevra çalakiyeke hêja li darxistin. Pîroz be!