Ji bo bîranîna wezîra derva ya Swêdê
Anna Lindh
Li paytext Stokholmê, ji bo bîranîna Anna Lindh, peykerekî ji cam çêkirî, yê ku sê m. bilind û 500 kilo giran hat danîn.

Anna Lindh par di roja 10-ê Îlonê de Stokholmê di maxazekê de ji alî êrişkarekî ve bi derbên kêrê hatibû kuştin. Mirina wezîra derva Anna Lindh gelê Swêdê tevde xist nav êş û xemginîyeke mezin. Anna Lîndh 46 salî û zewicî bû, dayika du zarokan bû. Ew siyasetmedareke mezin bû ku, ne tenê li Swêdê her wisa di warê navneteweyî de jî xwedîyê roleke berbiçav bû.

Bi mirina Lindh gelê Kurd jî dosteke xwe ya hêja windakiribû. Lindhê dijî siyaseta dewleta Tirk ya li hember gelê Kurd gelek caran rexneyên giring dikirin. Wê ji aliyekê ve piştgirî dida daxwaza Tirkiyê bo endametiya YE, lê eynî wextê de ji Tirkiyê aşkere digot gereke Tirkîye siyaseta zordestî û neheqiyê berde, riya demokrasiye bide ber xwe ji bo ku bikaribe bibe endam. Herwisa bi tundî li dijî planên dagirkeriya Tirkiyê ser Kurdistana Başûr sekinî. Helwesta Lîndh û ya serokwezîrê Swêd Persson di warê navneteweyî de tesîreke başkir. Lîndh piştgireke gelê Kurd ya giring bû. Mirina wê ne tenê ji bo gelê wê, lê ji bo gelê me jî ziyaneke pir mezin e. Gelê kurd dosteke xwe ya hêja winda kir. Em wê di salvegera roja mirina wê de bi rêz bibîrtînin.