Stokholm:
Federasyona Komeleyên Kurdistanê li Swêdê
li ser pirsa asîmîlasyonê semîrerek li dar xist

Stokholm-25.09.2005- Federasyona Komeleyên Kurdistanê li Swêdê bi fikra "Kurd ji bo ku xwe û zimanê xwe biparêzin divê li hember asîmîlasyonê rawestin" semînerek li darxist. Berpirsên weşanxaneyên kurdî, Alî Ciftçî-APEC, Haluk Ozturk -ROJA NÛ û Zeynel Abîdin Zinar-PENCÎNAR û nivîskar Kamran Haco pirsa asîmîlasyonê axifîn û bersivên pirsên guhdaran dan.

Ji ber ku beşdarên swêdî jî amadebûn, civîn bi swêdî hat meşandin, axaftinên bi kurdî bi wergerandina swêdî hatin pêşkêşkirin. Di destpêkê de Haluk Oztur bi kurtî qala siyaseta asîmîlasyonê ya dewleta tirk kir û ew wek jenosîta ziman û çanda kurdî bi nav kir.

Xwedî û berpirsê APEC Alî Çîftçî xetera asîmîlasyonê û alozbûna rewşa zimanê kurdî di van salên dawîn de, ji serpêhatiyên gera xwe ya li welêt bi nimûneyan da xuyakirin. Çîftçî li ser xebata kêrhatî ya weşanxana xwe û weşanxaneyên kurdan ên din got ku berê zimanê axaftinê gelekî jîndar bû lê lîteratura nivîskî gelekî kêm bû, lê îro êdî pirtûkên kurdî gelek in lê xwendevan kêm in.

Weşanger û berhevkarê folklora kurmancî, berpirsê weşanxana Pencînar Z. Abidîn Zinar ku bi xwe di warê berhevkirina edebiyata devkî, çîrok, fabil, mamik û h.w.d xebateke hêja kiriye, li ser pêwîstiya berhevkirin, zanîn û parastina çîrokên kurdî sekinî. Wî got klasîkên kurdî û berhemên zargotina kurmancî xezineyeke mezin e, divê rewşenbîr, nivîskar wê baş nas bikin û li dijî asîmîlasyonê bi kar bînin.

Nivîskar Kamran Haco jî îşaret bi xetera asîmîlasyonê kir û got ez jî çûm min dît li bakurê Kurdistanê kurd bi zimanê tirkî qise dikin, lê li Kurdistana Suriyê axaftina bi zimanê erebî di mal de wek eyb û şermeke mezin tê dîtin. Haco got ku bilî xetera asîmîlasyonê, pirbûna zaravayên kurdî ku her yekê di xeta xwe de berepêş diçe, tunebûna zimanekî hevbeş ango nebûna zimanê netewî ê standard wek xetereke mezin e li pêş kurdan. Di encamê de çi semînervan çi jî guhdarên ku raya xwe pêşkêş kirin, li ser hemfikir bûn ku çareseriya pirsê siyasî ye, lê heta roja çareserikina siyasî jî gelek erkên giring hene ku dikevin ser milê rêxistin, dezge û kesên kurd, gereke bi cî bînin.

Di civîna ku li Muzeya Etnografîk (Etnografiska Museum) du saet û nîvan dewam kir, mixabin hejmara beşdaran kêm bû. Berpirsê Weşanxana Roja Nû Haluk Ozturk ji seroka Federasyonê Bozarslan re pêşniyar kir ku Federasyon ji bo balkişandina raya giştî li ser pirsa helandina zimanê kurdî civîneke navnetewî re mazûvaniyê bike, pirsê bi çalakiyên mezintir bîne rojevê.