Heta niha li çar bajaran; Bremen, Koln, Manheim û Hamburgê konferans hatin li dar xistin. Hersê lêkolînerên hêja, Kurdistana 80 sal berê bi rewşa wê ya siyasî û civakî careke dî derxistin ber ronahiyê. Wan, taybetiyên vê berxwedana kurdan bi awayekî objektîv û zanistî ravekirin. Têz û derewên tarîxa resmî ya dewleta tirk careke dî pûç û vala derxistin. Hersêkan dan xuyakirin ku dewleta tirk ji berê de propagandên derewîn dike. Li gor îddiayên tarîxa resmî ya tirk, tevgera Kurdan tevgereke dînî bûye, Ingîliz li pişt wê bûne, lê ev ne rast e. Dîrokzanên kurd bi gelek belgeyên di destê xwe de, berevajî wan têzên dewleta kemalîst, îsbat dikin ku Tevgera Şêx Seîd tevgereke pêşverû bû, bi daxwazên neteweyî rabûbû û ingîlîzan wê çaxê hîç alîkarî nedaye kurdan, serda wan û firansizan alîkariya dewleta tirk kirine. Ev tişt hemû bi îsbat û belge ne..

Ji bo nûkirina hayedarî û zanîna li ser dîroka me ya nêzîk û çêkirina şuûra dîrokê, giringiya konferansên weha mezin e. Di eynê wextê de ji bo rêzgirtin û bîranîna di serî de Şêx Seîd û 47 hevalên wî yên ku hatine dardakirin û hemû şehîdên berxedanê ev konferansana gelekî giring in û hêjayî pîrozkirinê ne. Bila destê xebatkarên KOMKARê, destê nivîskar û dîrokzanên me Mehmet Bayrak, Alihaydar Koç û Osman Aydin sax be!

Konferans dewam dikin. Di roja 29-ê Gulanê de li Wuppertalê, nivîskar-dîrokzan Alîhaydar Koç wê li ser eynî babetê qise bike.