Rojnama swêdî Aftonbladetê
xariteyeke Tirkiyê ku tê da Kurdistan jî hatiye dîyarkirin weşand. Ser vê yekê Tirkiyê acizîyeke mezin nîşan da

Çend hefte berê, rojnama swêdî Aftonbladetê bi pereyên wezareta turîzmê a Tirkîyê reklama turizma Tirkîyê weşand. Di nav nivîs û resmên ser Tirkîyê da xariteyeke Tirkîyê jî hatibû danîn. Li ser wê xariteyê, qismek ji Kurdistanê bi sînorekî spî û zirav hatibû nîşankirin û navê Kurdistanê hatibû nivîsandin. Rojnama tirkî Hürriyetê ev bûyer wek felaketeke mezin da xuyakirin. Pirs di parlamenta Tirkiyê da jî hat niqaşkirin. Rojnama Hürriyetê ne tenê rojnama swêdî, herwisa hukmata Swêdê jî gunahbarkir ku têkilî karê navxweyî ê Tirkîyê dibin, dixwazin welatê wan parçe bikin. Sefîrê Tirkîyê li Stokholmê Selim Kuneralp jî bi îxanetê hat gunehbarkirin. Dehwa li sefîr kirin ku rojnama swêdî bide mehkemê. Lê sefîr Selim Kuneralp li dijî vê daxwazê derket, got eger em bidin dadgehê (mehkemê), Tirkîye wê jê zirarê bibîne, çimkî mimkun e dadgeh tesdiq bike ku ew der Kurdistane.