Cîgirê waliyê Mûsûlê Xusro Goran di roja 12ê îlonê de li Stokholmê semînerek da. Babeta semînerê dîroka Mûsûlê û rewşa wê ya siyasî ya îro bû.

Semîner ji aliyê Nûneriya Hikumeta Herêma Kurdistanê ya welatên bakûr hatibû lidarxistin. Di civînê de bi qasî dused rewşenbîr û siyasetmedarên kurd bi baldarî gudariya Xusro Goran kirin. Wek tê zanîn rêvebirê îdara Mûsûlê ê kurd Xusro Goran di pirsa Mûsûlê de kesekî pispor e. Wî li ser Dîroka Kurdistanê û li ser bajarê Mûsûlê pirtûk nivîsandine. Ew li Stokholmê jiyaye û li zanîngeha Stokholmê beşê ekonomî û dîrokê xwendiye.

Xusro li ser pirsa Mûsûlê weha got: Di destpêka avakirina Iraqê de ku bi alikariya ingîlîzan çêbû- pirsa Mûsûlê peyda bû di navbera dewleta tirk û Iraqê de. Tirkan dixwastin Mûsûlê têxin nav sînorên xwe. Pirs bû kêşeyeke navnetewî. Ji bo çareserkirina wê Koma Neteweyan dest avêt pirsê. Koma Neteweyan di sala 1924a de komîsyonek şande Mûsûlê ji bo lêkolînê bikin û vê derheqê de raporekê amade bikin. Piştî xebat û lêkolîna salekê wan rapora xwe pêşkêş kirin. Di wê raporê da dema behsa Iraqê derbas dibe Mûsûl li dervayî Iraqê tê hesibandin. Di raporê de tê destnîşan kirin ku ji sedî şêst pênc (%65) xelkê wira  kurdin û lewma di cî de ye ku mirov ji wan re jî dewletekê ava bike. Lê ji ber ku wilayeta Mûsûlê di hêla aborî de gelekî girêdayî Bexdayê ye gereke daxilî Iraqê be. Û wisa jî kirin. Lê îro pirs ketiye ser riya çareserkirinê. Gelek tişt cî bi cî bûne, lê gelek tişt jî hîna li benda çareserkirinê ne.

Goran derbarî dîroka bajarê Mûsûlê de, etnografya wê û giringiya wê ya di prosesa avakirina Iraqa de ravekir. Wî got ku Mûsûl ji berê de bajarekî giring ê bazirganiyê ye, û Mûsûl bajarekî kozmopolîtîk e. Îro jimara ereban di nav bajêr de zêdetir e, lê her wextî weha nebûye. Beşekî giring yê xelkê Mûsûlê yê ku xwe ereb dihesibînin di eslê xwe da kurd in, asîmîle bûne. Ew bêtir ji eşîrên kurd omerî, kîkî û gergerî ne. Niha ku Kurdistan azad e ew êdî li kurdîtiya xwe xwedî derdikevin, ji ber ku tirs nemaye. Hemû kurdên koçber vegeriyan e. Gundên kurdan de ereb nemane, eşîra gergerî, êzdî û fille berê xwe ereb didan qeydkirin, lê nuha ev pirs jî nemaye. Têkiliyên kurdan û ereban baş in. Lê sînorekî dirêj yê Mûsûlê bi Suriyê re heye, kontrola wê dijwar e, hêzên xêrnexwaz, terorîst bi hêsanî xwe berdidine hundur û karên teroristiyê saz dikin.

Xusro Goran, nediyarbûna sînorên federaliyê wek pirsa serek e ya mezin,  destnîşan kir û got ev yek dibe sedemên gelek tevlihevî û serêşiyan. Wî, di axaftina xwe de bi tundî li ser pêwîstiya xurtkirina tevgera netewî li  Mûsûl û Kerkûkê sekinî. Wî got gereke kurd bi hev bigrin û bi şêweyekî neteweyî tev bigerin. Xusro ji hevwelatiyên kurd yên li dervayî welat tika kir ku di serjimar û hilbijartinê de beşdar bibin.

Cigirê waliyê Mûsûlê di van salên derbasbûyî de wek parêzge çi xizmetên sereke kirine bi jimar û fakta pêşkêş kir. Mesela li Mûsûlê 144 mekteb vekirine, perwerda bi zimanê kurdî gelekî pêşda çûye ûhwd.