CIVÎVÊN BÎRANÎNA NURETTÎN BASUT

Ji bo serxweşî û bîranîna berpirsîyarê giştî yê rojnama Dema Nû, yek ji danerên HAK-PARê û endamê serokatiya wê Nurettin Basut li gelek bajarên Awropayê civîn hatin çêkirin. Li Munihê (9 adar) Bremen (10 adar) Nurnberg (10 adar) Paris (16 adar) Berlin (16 adar) Lozan (17 adar) Wuppertal (17 adar) Den-Haag (17 adar) Stokholm (17adar) Kopenhagen (17adar) civîn pêkhatin. Di van civînan da bi hejmareke mezin kesên demokrat û welatparêz û nunerên partiyên siyasî ji herçar beşên Kurdistanê beşdar bûn û ji Partiya Sosyalist a Kurdistan (PSK)ê û malbata Basut û ji gelê kurd ra serxweşî xwestin. Gelek mesajên serxweşîyê hatin sandin.

Di van civînan da hevalên wî li ser jîyan, kar û xebata Nurettîn Basut qisekirin, camêrî û merxasîya wî anîn zimên. Fîlmeke vîdeoyê, ku ji mîtîngên Nureddîn yên li hilbijartina gîştî ya sala 1991'ê da, li Agirî û qezayên wê hatibû filmkirin di civînan da hat raydan. Çawa ku tê zanîn Nurettin Basut di wan mîtîngan da bi zimanê kurdî propaganda dikir û bi her awayî dajote ser tirs û xofa dijmin. Beşdarên civînan bi kela dil, bi hestekî dilxemgînî lê herwisa bi serbilindî ew temaşe dikirin. Di gelek civînan da nas û dostên Basut jî radibûn li ser wî qise kirin.

Kemal Burkay li ser jîyan û xebata Nûreddîn Basut xeberda û got:
"Nûreddîn sala 1975an da pistî derketina kovara Riya Azadî (Özgurluk Yolu) tevî refên me bû. Ew yek ji wan hevalên me ye ku bajarê Agirî (Qerekose) ji hêzên faşîst paqiş kirin, ev bajarê serhedê kirin kelhayeke sosyalîst û soreşgeran li Kurdistanê. Dijmin û hevalbendên wan gelek caran cehd kirin ku Nûreddîn bikujin. Wî di hebsa cunta faşist ya Erzurumê da berxweda û bi serbilin jê xilas bû, li derva jî di meydana xebatê da gelek caran xetera kuştinê derbas kir, lê mixabin van rojan me ew di qezayeke trafîkê da winda kir... Mirina wî ya bê wext xesareke mezin e.
Wî got:
"Xesera me, êşa me çiqasî mezin dibe bila bibe jîyan û têkoşîn dewam dike û gereke bike. Divê em tunebûna wan hevala nedin hîskirin. Tevgera netewî ya kurdî wê cîyê zîyan û xesera xwe dagre. Vî gelî gelek tengahi dîtin, lê tevgera wî ranewestiya. Serê malbata wî û gelê Kurd sax be."
Burkay yek bi yek behsa wan kadroyên PSKê ku vê dawîyê di qezayên trafîkê da hatine windakirin kir û li ser kar û xebata wan qise kir. "Burkay di axaftina xwe da ev tista jî got:
"Me evqas heval li pey hev di trafîkê da winda kirin, herçiqas destê me da ji sedî-sed delîl tunene jî, lê ji me ra şik çê dibe ku li pişt mirina van hevalan destek, dezgehek heye. Bibê nebê ev şik ji me ra peyda dibe."

Di civînê da ji axaftina Nûreddîn Basut ya hilbijartina sala 1991 li Agrî bi video hat nîşandan, ji dengê dengbêjê gelî Şakro straneke serhildana Girîdaxê û meqameki gelêrî bi dengê bilûrê hat guhdarîkirin. Bi beşdarî û pergala xwe civîna serxweşîyê layîqî biranîna Nûreddîn Basut û hogirên wî bû.

Masajên ku ji civînê ra hatibûn şandin

-PDK- Dilşad Barzani
-PDK (Iraq) - Komîta Swêdê
-YNK- Komîta Swêdê
-Hevkari (Hevkariya hêzên siyasî yên Kurdistanî li Swêdê)
-RSDK (Rêxistina Sosyalîst a Demokratîk a Kurdistanê)
-Taha Berwarî-Nunerê Hukumeta Herêma Kurdistana Îraqê li bakurê Ewropa)
-Komîta Rêzanî ya Partiya Yekîtî ya Demokrat a Kurd li Sûriyê (Yekîtî)
-PADEK
-PDK- Bakur, Sekretrê gistî Hemres Reso
-IKS (Insiyatîfa Kurdên li Swêdê)
-Komîta Ewropa ya Partiya Çepê Kurd li Sûriya
-Komîta Rêxistina Ewropa ya Partiya Yekîtî ya Demokrat a Kurd li Sûriyê (Yekîtî)
-Rêxistina Ewropa ya Hevbendîya Dêmokrata Kurdî li Surîya
-Partiya Demokratiya Kurd li Sûrîyê (Alpartî)- Rêxrawa Swêd
-Hevbendîya Dêmokrata Kurdî li Surîya-Komîta Swêd
-Komela Nivîskarên Kurd li Swêdê
-Federasyona Komelêyên Kurdistan li Swêdê
-Partiya Yekîtî ya Kurd li Sûriya-rêxistina Hollanda
-M. Alî Yildirim (serokê Hevkar)
-Yekitiya Ciwanên Kurd li Swêd- Amer Salih (serok)
Elî Baran
Metîn can
Zekî Ozturk
Sêxo Burcak
Bayram Ayaz
Dara Bilek
Şukru Gulmuş
Osman Aytar
Zaza (Helga Nusser)
Alî Ardil
Ihsan Şener
M. Şerif Şener
Yildiz Şener
Ahmet Karamus
Lawîn Ciwan

Civîna Kopenhagenê

Huseyin Kizilocak

Ji bo bîranîna ewladê gelê gelê Kurd ê heja Nurettin Basutê ku me di roja 5ê Adarê, di qezayeke trafîkê da winda kir, gelek civîn tên çêkirin, yek ji wan jî li paytextê Danimarkayê Kopenhagenê bû. Civîn ji alî PSK û KOMKAR-Danîmarka hatibû amadekirin. Heval û hogirên Basut, kesên welatparêz û nunerên partîyên siyasî beşdar bûn. Hevalên wi li ser jiyan û xebata Basut qisekirin, nunerên partiyan mesajên xwe yên serxweşiyê xwendin. Di salonê da wêneyê Nurettîn ê ku li ser çiyayê Agirî hatibû montekirin û li ser "OXIR BE CAMÊRO!" hatibû nivîsandin bi gulên rengên kurdî hatibû xemilandin û li kileka wê jî gulên ku rêxistinên din anîbûn, hatibûn danîn.

Civînê bi rawestina ji bo rêzgirtinê destpê kir. Dûra li ser navê PSK-Danîmarka hevalekî axaftinek kir û behsa jiyan û têkoşîna Nurettin Basut kir. Dûra jî du hevalên ji mintiqa wî ku bi salan pê re xebitîbûn û tevayî di zindanê da mabûn, behsa henek û rûkenîya wî, xebat û mêrxasîya wî kirin, bîranînên xwe bi beşdarên civînê re parvekirin. Ji van hevalan yekî straneke Serhildana Agirî ya ku Şakro dibêje û Nurettin gelekî hez jê dikir, got hingê gelek ji guhdaran histêrên xwe negirtin girîyan.

Pişt re nunerên YNK, KDP-Iraq, KDP-Îran, KDP-Bakur, Rizgarî û nunerên Însîyatîva Kurd li Danîmarka jî qise kirin û wan ji malbata Basut ra, ji endamên PSK û ji gelê Kurd re serxweşî xwestin.

Civîn bi xwendina helbesteke ku hevalekî wî li ser nivîsandîye û bi mesaja Sekreterê giştî yê Partiya Sosyalîst a Kurdistan Kemal Burkay xilas bû.