BÛMLÊRZ

Wendox delal, sar welat mi no bîekes!
Çond ruêjo ma hay xeberon bûmlêrz bajar Xarpîyêt û yê Meletî guestarê kên, sond ra hetonê nîemê sow sêyr televîzyonon kên. Ray esta zerrê ma bina teng, hesir çimon ma ra yên war, ray ray zî ma bên sa; helag vînên qija kiskek bin bonon rijîyayon ra mêrg ra xelsinaya. Welat ma haw xetê bûmlêrz ser û sar welat ma zî emir xwi di çond rayon xirabi bîyayis, merdis û zerar zîyan yey pê çiman xwi ya vînen.Bûmlêrz, zelzelê bajaron sê Ezirgan, Çowlîg, Wan, Gimgim, Lîcê û yê bînan di hezaran ra sar welat ma mêrd, nîo zî bî birîndar. Bad bûmlerzona kîyê newe ra virazîyey û rayna sê vêr sar inî bajaron dest cuyayis xwi kerd. Helbet inî ruêj têng û tarî zî vîyerên, milletê ma birînon xwi kewînena û rayna kuena herayê, ruesnayê. La inî ruejon di gerega ma pastê yowbînan bîg, dêst yowbînan tepis, zerrê xwi hera bîg û ardim bîk eyî cîrananir ko kêy yin rijîyaw, merdim yin mêrd, pes û dewar yin telef bû. Waxtag ma ina ruej di pastê yowbînan bîg, him bar eyî kîyon ko zerar dîw ben senik û him zî yi pê holê, rindê, camîyerdê cîranan xwi ya hesîyên, zerrê yin zî bena sa.

Nikay zî ruejê bûmlêrz bajar Çowlîg û duarmalê yi amê mi vîr. Mi awi waxt di lîse di yê qezayê bajar Xarpîyêt, Depî di wendên. Asmê gulan wesarib. Herca bib kuehe, pes vêjîyab teber,bêrî sîn bari. Helê bûmlêrz di ez tor qeflê bêrîyona Santîya ra amên dow, yin pes dutib, sit pês kerdib asîron û asîr sit zî kerdib toron, tirê estib xwi mil û lingon pîyerû pîya rayêr aswalt yê binatê bajar Xarpîyêt û Çowlîg ser ra sîn dowê ma Sarcon. Waxt zî nîmruêja pê, vera son bi. Ez ha sêr rayêr aswalt ra sina, verbo Bîr Sînan sêr pird bin gualê Santîya di, mi hend ra dî yow qamyon ha cuard hêt bajar Çowlîg ra yena, ti von qay derê ya sêr rayêr di kay kena. Mi va qay derê sofor yey dîreksîyon makîna xwi dest ra nata weta ben û on, haw pê qasta oter ramen. La mi awi hay di xwi da kistê rayêr û pê hesîyeya ko rayêr aswalt haw nata weta sê gungulay qijon sen û yen. Ez qereya, mi bêrîyan ra va; hê bîeveng bên, bûmlêrz ha bena. Awi hay di bêrî pîyerû bi qefle amên û pê vêng bêrza tor yowbînana qal kerdên.Ina semed ra yi pê nihesîyay ko zelzeli haw ben. Sinîg bêrî bî bîeveng û pê hesîyay ko erd haw nata weta sen û yen, hema naray zî bî qêrî wêrî yin. Bermên, von hêwax nikay dow bîya xirabi û merdim ma, qij ma pîyerû bin bonon rijîyayon di mêrd. Bêrî bin torê sit di hêt dowa vazdon û êz ha tor yina vazdona. Tabî eya hel di herkes mereq ken ko bizon, kam merd, kam mend. Ma yarmê derê Xelêf ra vêjîyay dow ma ra asîyayn, yow dûman kîyon dow ser bib berz. Cinî bermên, ewlad yin êst, mîyerdê yin, way û biray yin. Axir ma leza beza hay hêt dowa yên, yarmo Derg di ma rast yow dowij xwi amê, Yad Sîk Zêyn bi wi. Wi zî sîn Bîr Sînan ko bizon pî yi ica sebû, est, çîn. Ma ci persay, dow di sebû? Yi va teway xesar giron çîn, tay lûajin kîyon rijîyay, çow nîe merd û nîe zî bû birîndar.

Narê heton ma xwi resna dow bi sond. Erd honc nata weta sîn û amên, sar kîyon xwi ra vêjîyab teber û varon varayn. Awi sond camîyerdon yegay Fêz di çadir gurêt a û yin kulfêt kîyon xwi bêrd kêrd eyi çadiron. Narê kêy ma ra kulfêt kîyî pîyerû sî yegay Fêz di kot bin çadir, la dapîrê ma Qudret va; ez kêy xwi terk nîkena, ez bin bon xwi di merena û honc nisena yegay Fêz di nikuena bin çadir. Ez û biray mi Haspî ma hema nasî, ma sên zerrê bon û kuên dapîra Qutkê layk, wirz wi ma tu bên teber, la yey kerdib înat û niwastên tor maya kîye ra vêj teber. Namê eya dapîrê ma zî Qudret bî, la ma yey ra vatên Qutkêy û dowijon zî yey ra vatên; Qutê Mexsan.Narê ez û Haspî ma sîn zerrê kîyî û her yow koton bin yow mil yey, warzinayn pay,la hema eya hel di erd tîyeser ra nata weta sîn û amên, bîn qirç qirçe asrtaraq bon. Ma terson ra dapîra Qutkêy ca verdaydayn û kîye ra vêyîyayn teber. Axir pênîd ma çond girang sî amê,la ma ya bin bon ra vet berd yegay Fêz di kerd bin çadir. Ap mino Îsmet zî eya ruej di niwes bî,wi zî camîyerdon kerd xwi past û berd yegay Fêz. Yegay Fêz zî kêy ma ra nizdê disê, hîrsê metro ca dûrib.

Nikay ez rayna agêr bûmlêrz bajar Xarpîyêt û yê Meletî ser. Ini bûmlêrz di hetonê nikay 39 merdim mêrd û 1607 kês zî bî birîndar. Hûma rehmê xwi merdonir bik û birîndaron rî zî sîfa wazena. Sarrê sar welat ma û yê merdiman yin wesib. Rueja teng di cîranon xwi teyna meverdên, nî ruêj xedar û tarî zî yên vîyerên sên. Holê holîyer teway na dinya di çîn, pastê yowbînan bîgên ko Hûmay zî sima ra hes bik. Bena hol, bena rind ma pîyerû pîya rueja newî,
zelal û delal zî vînên.

Suphi Aydin