ÇEND VATEYÎ

Ez vana ke; heta ke dewleta ma çînî bo, qetlîamê ‘Pîrûsî’ nêqedînê. Bê dewletîye bi xo, qetlîam o.Binê bandura dewleta Tirkî de, ‘hastîye, silametîye, demokrasîyê’ ma ra nêna. Xora dewleta Tirkî, serê qetliamê ma ra virzîya. Inkar û qetliamê ma ke mebo, dewleta Tirkî zî nêbena. Kes ‘binê manga de, golikî ra megêro’. Sîyaseto ke bê dewletîya ma wazena, qetlîamê ma zî (nîyetê xo çi beno-bibo) wazena. Mi ra, ma ra, binê bandura dewleta Tirkî de qalê ‘hastîye-demokrasîye’! Mekerê! Heta ke ma binê bandura dewleta Tirkî de bime, ê qetil kenê, ma zî ‘sermezar’ kenîme. Sermezar kerdene, rind o,la çare nîyo. Hesabê sîyasetî zaf o. Kam ke ma qeit bikero, planê xo yê ver û dima qetlîamî de zî virazenê. Medyayê xo,vateyê xo, amade kenê. Manîpulasyonanê xo amade kenê.

Ez vana ke; qetlîamê Pîrsûsî, dewleta Tirkî kerdo, erceno ISID i ser o. Ya zî ebe ISID ‘i do virastene. Axir çi beno-bibo, adrêsa qetlîamî, dewleta Tirkî ya. Seba naye, luzumê çuwalê analîzan çîn o.

Ez vana ke; Kürdi gereke biaqil bê. (Mi xelet fam mekerê, mevajê Kurdî biaqil ê, ti qey nîya vana)Ney bira ney; Kurdi siyaset de zaf zî biaqil nîyê. Eke biaqil bîyêne, Rojava û Basurî, roja verî,bê veng û qal û qir, ameyênê têlewe. Rojava de cayê ke raxelesîyê, PYD yî kerdo piro vano ‘Kanton’. Amerikayî ra mebîyêne, Kobanî qedîyêne. Rojava ke pistîya xo tayê berz keno, ancîna mesajanê negatîfan dano Kurdistanê Bakurî. Seba pistî dayena Pesmergeyan ra zêde, çend ‘sosyalist û çepê Tirkan’ ra ‘minete keno’. Ez vana ke; no, plan o, planêde ver bi xoserîya, dewlet bîyena Kurdistanî yo. Nê sosyalîstê marîjînalan de ke xeyr bibo, Tirkîya de ‘çîyê kerdêne’! Nê komê marîjînalî vanê ,’ma rojava pîya sevekna, pîya virazenîme’. Gelo rast o? Kamî Rojavayî, ISID ê barbaran de, raxelesna? Zelal o ke quwetê koalîsyonî raxelesna.

Ez vana ke; ‘halklarin qardeslixî rind o’, la no, çare nîyo. Sîyaset de kes ‘qardêsê kesî nîyo bira’! Siyaset menfaat o, keko!

Ez vana ke; domananê sarê ma, seba planê entegrasyonî’ mexapnê! Seba entegrasyonî, luzumê herb çîn o!

Ez vana ke; Kurdistano Basur, ewro sey dewlete ya. çoka ke Dinya nas kena. Sima ke dewlete mebê, pancas mîyon bê zî, fayde nêkeno. Qetlîamê Pîrsûsî, ne ê verêne ya, ne zî peyên.

Ma çare?

Çare, dewlet bîyena ma ya.

Ez vana ke; Dewlet bîyene, ebe teorîyê ‘ekolojik û bîyolojîkan’ nêbeno! Ma ra ‘ekolojîk û bîyolojîk’ ney, dewlet bîyene lazim a.

Ma sima nêzanenê, Sezaî û Aysel ê DTP yî, çi vatî?

Ma sima nêzanenê, kamî gege bi ‘nameyê Kurdan’! Çi vatî û vanê?

Gelo rast sima nêzanenê?

Ez vana ke; Na Dinya de, yew hedefê ma esto, yew çareyê ma esto, o zî, wayîrê qederê xo, wayîrê îdare û îradeyê xo, wayîrê dewleta xo bîyene ya.

Eger ke bê naye, çareyêde bîn, seba raxelesîyayîsê ma esto, kamê zanenê wa vajê.

Vajê, la ma mexapnê!

Ma zaf xapîyayîme.

Qetlîamê Pîrsûsî, xora serê nê xapnayîsê ma ra virazîna û virazîya.

Heya; sermezar bikime, lanetî ro barbaran, qetlîamkaran, gonîweran bîyame, la tenya naye kerdene, çare nîya.

Welatê ma; na Dinya de, mintiqayê ke barbarî çar hawîr estê der ê. Barbaran de ‘ne dîn ne îman’ çîn o. Barbarî ‘demokrasîye, ahstîye-mastîye’ nêzanenê, fam nêkenê. Barbarî tenya quewt ra fam kenê.

Coka ke; gereke ma bibime wayîrê quwetî. Gereke am bi xo, xo biseveknime. Gerekê ordîya ma bibo.

Gelo ez, ordî, herb û pirodayîs ra zaf hes kena? Ney! La ez ‘rastîye ra’ hes kena. Rastîya ma, na wa.

YA MA ZÎ BESE KENÎME XO SEVEKNENÎME, SEBA NAYE QUWET Û ORDÎYÊ MA BENO, YA ZÎ, MA BINÊ QUWETÊ BARBARAN DE BENIME PAN Û PUÇ!

Pîrsûs; sêneyê to de, 32 kesî sehîd bîyî. Hîris û di xortî, hîris û di gulî.

Pîrsûs; heta ke ti bibê ‘Suruç’, ma, dawakar îme.

Pîrsûs; Naye rind bizane ke, herêy bibo zî, çila azadîye, çila xoserîye, sêneyê to de beno berz.

Pirsûs; no, slogan, no, ajîte nîyo. Gonîya nê sarî zî, ‘awe nîya’.

Ilhami Sertkaya