DUEWO ÇIM ZENG, CINÎYEKA QÎCALEK Û VILÎK DÊST XANIMAN

Wi yow duewo çim zeng bi.
Yi hes kerd yow cinîyeka qîcalek ra
Hesrêt cinîyek yow bon qiskek bi,
yey wastên baxçê eyî bon di
renb bi reng ra
vilîk girdib.

Sê yow duê hes kerdên yi yey ra.
Û deston yi ra her guri amên,
têna neskayn wi dîyeson eyi bon viraz,
yi ra namên ko bêr eyî bon buk
awi bon ko baxçê yi di
reng bi reng ra
vilîk bên gird.

Wi yow duewo çim zeng bi.
Hes kerd yi yow cinîyeka qîcalek ra.
Ya yow cinîyeka qom kir û qîcalek bî.
La yey têna rehatê gon xwi wastên,
qefelîyey ya rayêr duêwo dûr û derg di.
Xatir xwi wast yey duê çim zêng ra,
Ya sî kot virarê yow merdim qiskêka
wayêr eyî bon ko baxçê yi di
reng bi reng ra
vilîk bên gird.

Inkay pê hesîyaw ko duewo çim zeng,
Nesken bibo mezel zî heskerdis rastkînonir:
awi bon ko baxçê yi di
reng bi reng
vilîk bên gird…

FOTOXRAFON DI BEN GIRD LAC MI

Dêj yow leyekag yemis yey tira bû kot zerrê mi,
mi çiman ver ra nisen xeyal rayêrog sen Halîç,
yow karda di fek fînaya zerrê mi ra,
hesrêt ewlad û yê Stembol o.

Xerîbê zaf çetin û xedar nîya?
Qey hend giron yen ma rî qedêr ma?
Ma qay çinaya werrê xwi pê sara on?
Pî sar haw Stembol di hepson do,
wazên lac sar bêrz dard
binatê rayêr di
vêr çiman herkês di.

La ez itîya di sê heway,
sê yow deyrê milleta azada,
ti ica di mênd lac mi,
ti hema qij û ço qijon nerzen dard.
Wa lac sar qetilkar nîyêb,
pî sar wa memir,
semêd yow letê nan û firfirok bîyar kîyon xwi
ica di eynon bênd xeniqnayis kerd xwi çima.

Merdim,
merdim zerr pak,
vêng xwi berzkên çeher kuesê dinya ra
vajên hin besa,
wa celat bend mêrz qirikon.
1954

Wendox zon ma yê delal, inî wird helbêst cuarîn yê Nazim Hîkmet’ê û mi açarnay zazakî ser. Serra newî sar welat ma rî bereket, azadî, serbestê bîyar! Sima pîyerûn rî serfîrazê wazena. Herçî ra vêr herçeher hetanê gêl xwi rî serberzê û asitî wazena, Hûma yin zalimon ra bipaw. Heyanê rayna wes û war bimanên.

Suphi Aydin