ERDHÊJA GIRAN LI WELAT
6ê Sibatê li bajarê Merasê, mintiqa Pazarcix û Elbîstanê bi dû hev du erdhêjên giran çêbûn. Dereca yekê 7,7, ya dine jî 7,6 bû. Ji ber van erdhêjan li Merasê û 9 bajarên der û dorê (Meletye, Semsûr, Dîlok, Kilîs, Ruha, Amed, Edene, Osmaniye û Antakiya), her usa jî li Rojava (Efrîn, Idlîp û hêla Helebê) bi hezaran mal ruxiyan, bi hezaran kes jiyana xwe winda kirin û bi dehhezaran jî birîndar bûn. Hejmara mirî û birîndaran mixabin roj bi roj zêde dibe.
Li van bajaran dora 13 milyon kes ji erdhêjê zirarên mezin dîtin; lê bi rastî temamiya xelkê welat êsiya.
Yên ku sax man jî piranî di zuqaqan da, di bin berf û barana, sermaya sibatê da birçî û bêçare mane.
Ev rewsa hanê ji duh vir da dil û cegera me hemûyan disewitîne, ku ne li herêma erdhêjê ne.
Ev felaketeke gelek mezin e ku xelk û welatê me rû bi rû maye.
.
Ez ji hemû insanê me ra dibêjim: derbazî be. Yên ku xelkên malê û dost û hevalên xwe winda kirine ji wan ra sebir dixwazim. Bila serê wan sax be. Bila herçî birîndar rojkî berê sifa bibînin.
Em wek Wakfa Riya Azadî, çiqa ji dest me bê, hewl bidin ku alîkariya kesên muhtac bikin. Endam û dostên wakfê, heval û hogir ku dixwazin alîkarî bikin, bila bi me ra pêvendî daynin.
Kemal Burkay
Serokê Wakfa Riya Azadî
Dengê Kurdistan
