Ero biko! No ‘Demokratîk Cumhuriyet’ çik o?

Ti qey xo xapnena?

Qey sar to qapneno?

Ero biko! Fekê to ra hazar vate û qiseyî vecînê. Ti henî nusnena qisey kena ke; e yê ke biwanê, bihesêne, zen kenê ke ti zanyar a, alim a, malim a, rostîbî ra!

La ti çi hêfy ke kaykerdoxê sarî ya.

Ero biko Ti Tirk a? Ney

Dewleta to esta? Ney

‘Cumhurîyetê’! To esto? Ney

Ma no çi ‘demokratîk cumhurîeyê to wo?

Ti ziwanê xo hîna nêzanena, la qalê zaf çîyan kena

Ti kamîya xo, tarîxê xo nêzanena, qalê ‘tarîxê Dinya kena

Ero biko! Ti Alîsêrî, Zerîfa Xanime, Doktor Saîd Kirmizitoprakî zanena? Ti zanena mezelê înan kotî der ê? Ero biko! La ti Çhe Guwerayî, Fîdel Kastroyî, Klara Zetkînî rind zanena.

Ero biko! Ti Tirkî, Almankî, Franskî û ê ziwananê bînan zanena, la ti ziwanê xo nêzanena.

Ero biko! Ti zaf qalê ‘kapîtalîst modernîteyî’ kena, la maneyê xo çik o, kamî nê teorîyan seba çi nîyetî kerdê fekê to, ti nêzanena.

Ti zaf qalê ‘halkkarin kardeslixî’ kena, la kamî na çekuye seba çi kerdo fekê to, ti nêzanena.

‘Cumhurîyetê’ to esto ke, ti wazena naye ‘demokratîk’ bikerê?

Lawo meke!

Mebe kaykerdoxê sarî.

Ero biko! Ti hîna ebe ziwanê xo, yew slogan vajê, la ti ebe Tirkî pêro sloganan qîrena.

To xo raxelesna, na raya sarê bînan, sarê Tirkî rsxekesnena?

Ti bîya wayîrê dewleta xo ya demokratîke, na raya wazena dewleta Tirkan ‘demokratîk’ bikerê?

Ero no ‘ekolojîk-bîyolojîk’ çik o?

Ma her çî hal kerd tenya no êkolojîk-bîyolojîk’ mend?

Ma ra zaf lazim bî nika no ‘ekolkojîk û bîyolojîk’?

Handayê qehremanî seba nê ‘ekolojîk û bîyolojîkî’ canê xo dayî?

Ero biko! Ragêrê rastîya xo.

Pêro teorîyê ke wazenê to heqê dewlet bîyena to ra durî bikerê, zur ê, kay ê.

Ti nê kayê mixenetîye key fam kena? Key vênena? Ti key hasar bena?

Ero ti hîna mezela Sey Rizayî, Sêx Saîdî kotî der ê, nêzanena, la ti mezela Silêman Sahê Tirkan ra wayîr wecîna, seveknena. Ebe nê halî ti gege qaso ‘ax-wax’ kena ke na Dinya de hîna bi ziwanê xo, qet yew mekteb çîn o

Ma bi nê halî, se bibo, biko?

Ilhami Sertkaya