EZ, CHARLIE’ YA (JE SUIS CHARLIE)

Îslamê gonîwerî, Parîs de, huyayîs birnayî, 12 kesî kistî.

Huyayîs ke mebo,însanîye zî, ciwîyayîs zî nêbeno! Gonîwerî, dismenê însanîye û huyayîsî yê!

Wes bo huyayîs!

(Seba qirkerdena CHARLIE, seba ke înan yad kena, seba xatirê huyayîsî.)

TAYÊ BIHUYIME

Suke de, beledîya darî nê ro. Roja bîne, ê darî pêro siknê. Beledîya, seba naye operlo de nê anosî keno;

-Dîkat, dîkat! Ê darê ke ma nê ro, kamê ke siknê eger ke heyban ê, xora hêyban ê,eger ke doman ê, domanê hêybanan ê, ha! Eger ke pîl ê, hêybanê lajê hêybanî yê. Mevajê ma nêhesêna!

XXX

Seba ke înternet de tayê çîyan nêzaneno, telefonê înformasyonî keno merik. Dîyalox nîya wo;

-Alo, o ca înformasyon o?

-Heya, kermeke

-înternet de ez nêsikîna binusnî

-înterner rakerde yo?

-Heya

-Modem vêseno?

-‘Modem’ çik o?

-A qutîya înternetîya ke lembeyî vêsenê

-Heya, lembeyî vêsenê

-Qablo bance, reyna cike

-Elektrîk birî yo, çîn o

-Ha! Nika ti internetê xo bike qutîye, to kotî ra ke herêno, henî bere tepya cide

-Ma ez ci ra çi vajê?

-Vaje ‘ez ehmaq a, înternet nêzanena!

XXX

Polês rastê di domanê tînercîyan beno. Juyê ra pers keno;

-Adrêsa to, kêyeyê to kotî yo,? Ti kotî de manena?

-Adrêsa mi îta wo, kêyeyê mi çîn o, ez îta de manena

Polês, ê domanê bînî ra pers keno;

-Ma ti kotî de manena? Kêyeyê to kotî yo?

-Ez zî cîranê nê hevalî ya

XXX

Maye kêneka xo ra vana, ‘To ke mekteb ra vecîya, cayê ra meso, raste rast bê kêye’. Kêneke sona mekteb. Mamostaye domamn ra pers kena;

-Sima de kamî wazenê sorê cenet?

Her kesî destê xo berz kerdê, vatê ‘ma wazenîme’. La heto pey ra na kêneke destê xo berz nêkerda. Mamsotaye ci ra vana;

-Kêneka mi, ti nêwazeno sorê cenet?

Kêneka vana;

-Ney mamosta! Maya mi va ke ‘ meteb ra vecîya, cayê ra meso, raste rast bê kêye’

XXX

Hîrê têlî porê merikî estê. Soni kuafor vano ”porê mi rast bike’. Kuafor ano -beno, ju têle visîna, a bîne zî visîna. Merik qarîno vavo;

-Beso lo! Vinde wa nîya vila bimano!

XXX

Lajek karna xo gêno, sono kêye. Karnayê xo de notî pêro ‘ju’ yê. Pî ke karna vêneno vano;

-Ero lajê mi, to loto qezenc kerdo?

XXX

Nêmeyê sewe, merik serxos o, yêno kêye, keweno cilanê cenîka xo. Cenîke qarîna;

-To ancîna simito ha! To serxos a ha!

Merik vano

-Ney

Cenike vana;

-Eke ti serxos nîya, qayîtê saete bike, vaje

Merik qayîtê saete keno, vano;

-Hey saet! Ez serxos nîya!

XXX

Di aqil ra newesî, vejîyê serê sayêre. Doktor înan vênneo, juyê ra seba ê bînî pers keno
-O se keno dare de?

-O, xo saye hîs keno

-Ma ti se kena îta de?

-Ez seba ey vindena ke wa o rezî bo, ez borî, o nika xam o

XXX

Di hevalî sonê hamame. Her kes pestemale keno verê xo ra, nê di hevalan ra juyê, rojname keno verê xo ra.Hevalo bîn pers keno;

-Ero ti qey rojnama kerdo verê xo ra:?

-Keko medyayê nê welatî her çi girs keno, coka

XXX

Merik sono doktor, derdê xo ci ra vano;

-Doktor, hasa ez cilan de ebe xanima xo, rew yêna

Doktor vano;

-Zaf rind, xora waxtê mî zî zaf çîn o!

XXX

Di karkerî, dîregê elektrîkîyê dêm dîyê, xebetîne ke berz bikerê. Qefelîyê, araq ra, bê mecal mendê. Dok ra ju kêneke, ebe maya xo ameyêne. Kêneke maye ra visîya, sona leweyê înan, meraq kena ke nê se kenê. Kêneke pers kena;

-Sima nê dîregan se kenê?

Înan ke cuwab dayî ci, kêneke ebe nê cuwabî ver bi maya xo remena vana;

-Daye, biremime!

XXX

Rojê ju aqilkemî ra pers kenê;

-Ti çend serrî ya?

-Çewres

Çend serrî ra dime reyna pers kenê, merik ancîna vano ‘çewres’. Na raya ey ra vanê;

-Çend serrî naye ra ver, ma to ra pers kerd, to va ‘çewres’, ti nika ancîna vana ‘çewres’, no se beno?

Merik vano;

-Keko! Meriko durist, sozê xo de vindeno!

Xxx

Makeme, cenîka gerrekare ra pers keno;

-Merikî xo est serê to, kincanê to dirna, to serê masa ra derg kerd, to ra bi no hal tecavuz kerd. To qet nêsikîya xo biseveknê?

Cenike vana;

-Ney, ez nêsikîya, çi ke mi newe oje kerdbî nîniganê xo ra, hîna hît bîy

Xxx

Xort, wastîya xo azebe ra pers keno;

-Wastîya mi, rast vaje, keso ke raya verêne kewto heyatê to ez a?

Azebe vana;

-Elbet tî ya wastîyê mi! Ez fam nêkena, qey her xort mi ra naye pers keno?

Xxx

Ju cîrane seba ke nan qedîyo, sona cîyana xo de nan dên wazena.

-Mi ewro nan nêpoto, ti sikîna tayê dên bidê mi?

-Willay mi dêne to, la awe kewte nan

-Awe se kewena nanî?

-Eke ez mewazî bidî, her çi keweno ci!

Xxx

Makeme, merikî ra pers keno;

-Ti qey dênê mêrikî nêdana?

Merik vano;

-Ez dana, dana la mi ci ra va hîrê asmî waxt bide mi. Hîrê serrî yo ke hîna waxt nêdo mi!

Xxx

Mêrik hevalê xo ra derdê xo vano;

-Qet pers meke bira! Ez xanima xo de, elektrîk nêgêna

O bîn vano;

-Xem meke bira, xanima to ke elektrîk nêdana to, cîranan de elektrîk bitire!

Xxx

Ju aqil ra newes, sono ju qawaxane, ju çaye û çar sekir wazeno. Ci ra anê. Çi ra dime, ancîna çar sekir wazeno. Garson vano;

-Ti handayê sekiran se kena? Mi çar sekir dayîbî to!

Newes vano;

-Hero! Ti nêvênena? Ê sekirî helîyê!

xxx

Mêrik verê keberê asansorî de vinete wo. Ci ra pers kenê;

-Ti qey nênusena piro?

-Asansor seba çar kesan o, hîrê kesê bînî zî bêrê, ez pironusî

xxx

Mêrik cênîya xo ra zaf hes keno. Her sewe duwayî keno; ‘Ya Homa, sarreyê aye ney, ê mi bisikîyo, derdê aye ney, ê mi bibo’. Duwayê xoyê penîyê zî nîya wo;

-Ya Homa,ya Heq! Aye vîya mevirde, mi vîya bivirde!

HUYAYÎS WES BO!

Ilhami Sertkaya