Nivîsar

Ez sima rind nas kena

Ez qalê kamî, qalê kamejî tewîr însanan kena ?

De tayê xo pêt bigêrê, eke zamet nîyo, rind biwanê.

Vano ‘ez serekê Kurdan a, la Kurdkî zî, Kirmanckî zî nêzano

Vano ‘ez sosyalîst a, kurd a, Kirmanc a, la ziwanê xo nêzano

Vano ‘ez demokrat a, marksist a, Kurd a, Kirmanc a, la ziwanê xo nêzano

Derg û dila bi Tirkî nusnenê, ‘zaf çi zanenê, zaf ziwanan zî zanenê’ la ziwanê xo nêzanenê

Turgut Ozalî zî vatê ‘ez kurd a’, Türkesî zî vatê ‘Ez çiqas Tirk a, handay zî Kurd a’

Ez sima ra qalê kamî bikerî ke?

Yanê ‘her kes gege vano ‘ez zî Kurd a, Kirmanc a’.

Nika bî çi?

Ferqa nînan, derheqê ziwan û kultur û kamîya Kurdan de, Kirmancan de estê?

Ney!

Ti, ebe bê halî ‘sosyalîst a, marksîst a, mi ra çi?

Ti, ebe nê halî, ‘demokrat a, wendox a, zaneye ya, nusnox a’, mi ra çi?

Ti, ebe nê halî, ‘zaf çi zanena, qal kena, nusnena’ mi ra çi?

Ti, ebe nê halî ‘antî fasîst a, antî emperyalîst a,’ mi ra çi?

Ti, ebe nê halî ‘humanîst a, lîberal a, amîr a, memur a, pîspor a, mîmar a’ mi ra çi?

Ti, ebe nê halî, qet seba kamîya xo, seba rastîya xo ‘nêbena walî’!

Ti, ebe nê halî, xizmeta ziwanê asîmlîasyonî der a.

Ti, ebe nê halî, tenya xo xapnena, domanan xapnena.

Xora musgulatê to û kamîye û ziwanê to, çîn o.

Ti, rastîya xo ra visîya, asîmîlasyonî to kerdo ‘pasîmîlasyon’!

Ti, ‘pasîmîlasyon a’!

Her hetê ma, ebe nê ‘pasîmîlasyonan’ pir o.

Serran ra ver, ez sîya yew semînerê Tirkan. Uca de qalê demokrasîye qerdêne. Maben ke da, mi qalê Kurdistanî kerd, seba kamîya ma, ci ra persê pers kerd. Merikî araq da, kerd pila-pile, qaso cuwabê mi nîya da;

-Pîyê mi zî Kurd o

Sima zanenê zereyê mi de çi vîyart?

‘Mi…… pîyê to……..’

Ez endî nê kayan û vateyan ra bîya bêzar.

Ma sima? Sima hîna ebe nê kesan û vateyan ra bêzar nêbîyê?

Eke henî yo, willayî sima ra ‘esq bo’!

Ilhami Sertkaya

Balkêş e ?
Close
Back to top button