HEMA ERÊ NIBÛ DELALÊ

Hema erê nibû delalê,
Parîs nivêsaw, xirabi nibû hema,
hema erê nibû delalê,
zerrê mi pîr nibîya hema,
ez yow sow, sowê asmê gulan’id
Sekuêy Volter di pastê tu bison dîyesa
û bisîp lewan tu ra
cuya pê surêt xwi biçarn ma hêt Notrdamm a
ma bon vilikon yi ra,
lezabez virar bisorayn tu mi ra delalê
ters, xof û sabîyayis ra,
û ti bîeveng bîeveng bibermayn
astarê zî wirde wirde bivarayn
tor yow varon tenik û senika.

Hema erê nibû delalê,
Parîs nivêsaw, xirabi nibû hema,
hema erê nibû delalê,
zerrê mi pîr nibîya hema,
ina sowê asmê gulan’id ma sekue ra ravîyer
bin valyeron ra, delalê,
bin valyoron ternon û gijkinon ra.
Mi tu ra yow çût qal wês hê Parîs bivatayn,
vatê bîe zûr, zelal û wês,
cuya pê fîtik bicenayn mi yow qeyde ra,
û ez bimerdayn heskerdis ra,
gon ma îno bik merdimon ra.

Taxa cuarîn di kîyê pê kerrona virazîyey,
raste rast amê virastis,
zeliqnayê yowbînana
û diyês yin ruesnayê asm ra
û pencerê yin lingon xwi ser rakotê
û per verbo ci di Luvr
bîyêrqena pê ruesnayî ya
ameya ruesn kerdis semêd ma ya
quenax ma wo bullûr…

Hema erê nibû delalê,
Parîs nivêsaw, xirabi nibû hema,
hema erê nibû delalê,
zerrê mi pîr nibîya hema,
Ina sowê asmê gulan’id sekued, embaran di
ma gon sêr varîllon sûrona ruenis.
Vêr ma di yow qanal kuen mîyon tarî,
Yow sat ha ma vîyerena sina,
silom bid yey ma delalê,
satag qemerayê yey çeqera ha ma vîyerena,
silom bid yey ma.
Rayêr yey hêt Belçîqaya, nîo zî hêt Hollandaya kuen?
Vêr bêr qemara di yow cinîyeka paç sipî
wes wes wiyena.

Hema erê nibû, delalê,
Parîs nivêsaw, xirabi nibû hema,
hema erê nibû delalê…
Parîsij, Parîsij,
wa Parîs mevês, xirabi nîyeb…

13.Gulan 1958, Parîs

Wendox zon ma yê delal, ina helbesta cuarîn yê Nazim Hîkmet a û mi açarnaya zazakî ser. Sinîg sima zî pê hesîyên ina helbest di Nazim Hîkmet von; wa herb çînîyeb û Parîs mevês, xirabi nîyeb. La çi persên, haw bi vîst hest ruêjo welat Ukrayna ser di gimo gimê tang, top û bombona. Wiris ramit welat Ukrayna ser û wazen eyî welat xirabi bik û bîg bin dêst xwi. Herb ça ben wa bib, wi tor xwi ya talon, kistis merdimon û zulim on. Ma hêvî kên ko yow ruej cuya ver ini herb bîyer vindertis û welat Ukrayna mîyer xirabi kerdis. Hûma heq zaliman ra bîyer û belengazan queri bik. Heyanê rayna herb ra dûr û mîyan sulh di bimanên.

Suphi Aydin