KOMKAR: Destê xo Gola Çetû ra biancê!
Binawe de mendena zîyargeha alewîyanê Dêrsimî Gola Çetû rê bêveng memanê!
Çito ke zanîno, Beledîya Dêrsimî seba seveknayena Eskefta Gola Çetû ya ke hetê alewîyanê Dêrsimî ra fîraz a, seba ke binê bendê Çayir Baraji de memano, dorberê eskefte bi kemer û kuç kerdbî pir, uca kerdbî parke, te de dar û ber nabî de. Naye ser ro midurê DSI beledîya Dêrsimî dabî mehkeme.
Mehkemeyê Huquqî yê Eslî-Dêrsimî bire/qerar girewte, ke wa Parka Gola Çetû biêro wesanitene. Bi na bire cayo fîrazo ke hetê bi hezaran kesî ra êno zîyaretkerdene, yanê Parka Gola Çetû o wo binê bendawe/barajî de bimano.
Se ke zanîno Gola Çetû hetê sarê Kirmancanê alewîyan ra zîyargehêde fîraze û sedrgiran a, fênda îbadetxaneyanê bisulmanan.
Destdergîye û binawe de verdayena nê fîrazan, ê bawermendan rê bê rîmetîye û bê rêzî ya. Sarê Dêrsimî, timî re estbîyanê xo yên mîlî wayîr vejîyo û o wo ewro kî re ci wayîr bivejîyo. Hukmatê Ak Partîye hînî bizano ke sarê Dêrsimî tenya nîyo. Hukmatê Ak Partîye çito ke mekananê bisulmanan rê wayîr vejîno, dest ser ro gêno ra, restore keno û newe ra virazeno, ganî dustê zîyargehanê alewîyan de kî rêz giredo, têkilê cayanê fîraz û bimbarekan mebo.
Serekwezîr Erdogano ke hetê ra jenosîdê Dêrsimî rexne û rîsîya keno, bi nameyê dewlete sarê Dêrsimî ra uzrê xo wazeno; ancî wazeno ke bareyê çareserîya persa Kurdî ya astîyanî de gaman bierzo, ganî seba seveknayena nirxanê Kirmancan yê fîrazan de kî gaman bierzo û plananê çewtan betal bikero.
Eke astîye êna Tirkîye û Kurdistanî, na bi naskerdena heq û huquqê mîlî û demokratîkî, bi rêzgirewtena bawerîyanê ê saran mimkun a. Na bi înkarkerdena yew miletî ya kî bi rijnayena zîyargehanê ê saran nêêna hurêndî.
Ma fênda Kurdên ke teberê welatî de cuyîme, seba sarê Dêrsimî pistdarîya xo nîsan danîme; ma wazenîme ke hukmatê AK Partîye bawerîye û fîrazanê sarê Dêrsimî rê rêz giredo. 28.06.2013
KOMKAR
Federasyonê Komelanê Kurdistanî
Dengê Kurdistan
