KUÊY BÊRZ

Nî kuêy ma yî kuêyî bêrzî
Zimag di sûng, kas di ribêsî
Înê Goran xwi serasêrî
Ruenist bêrî barê pêsî

Rengê gulan Xelefî xemilnaya
Kela verboci reng adaya
Kale kalê varon û mîyon ma ya
Hokinê varwon û sonon ma ya

Hesareka xwi rî vor beleka
Verboci Qreguêl Kurr û Meydaneka
Asmon wesar guel hezeka
Ez hesretê na feleka

Meydanek meydan astuaron
Bi mes û vazd bêz kehîlon
Kueçêr amê seyr û seyran
Guret xuêrt û kêynan dîlan

Çahlê Gendar sevînê mîyan
Vêng zelê Hes Mûs kota nî kuêy û dewan
Fecîr di Kurrij vêjîyay sêr inî banan
Xuêrt û kêynan guret guvend û dîlan

Ina elbikê inî kuêyona
Mîsk û ember ko xwi rî reng dona
Buêyê gul, sosin û rêyhana
Hesretê xuerton û yê inî kêynona

Çimê awê Sayer zelal veng don
Çimê awê Gird Pîl xuerêyê xwi di von
Awê Mergê Sêynan suerêt înan
Awê înê Xatûn sîfayê xwi don

Qirringuel û merga hêsîn
Merga Çeqer renga villîn
Mergê Sêynan awa sîrîn
Awê inî înan awa vorîn

Warê ma yî warê waran
Kuem, çadir, çît û xêman
Pes û soni ko inî varwan
Xulxul û xusexusê inî meskan

Zelê sonî ko veng dona
Bi zon xwi di qeyde vona
Vêng zel bir pês xwi ser di ona
Lûrlûrîka û hîkmet girona

Nî warê ma qay hend rindî
Kuêy û banî xwir gul û vil bî
Çira ma yin ra hend dûr mêndî
Bîe welat, kuêy û waran mêndî

Waxtag ma dî warê ma bî
Çît, xêm û kuêm yi yê ma bî
Soni, varwan û bêrî ma bî
Suerêt yellan warê ma bî

Ez Simkoyê Sercanija
Hesrêt kuêy bêrz û qija
Sueret û sahîyê waran ricîya
Ni ruej sîyawo ma ser di vêjîya

Wendox zon ma yê delal, ina helbesta cuarîn yê rehmetî pî mi Îsmaîl Aydin a û semêd wendisa sima rî nesir kina. Heyanê rayna wes û war bimanên.

Suphi Aydin