NIKA EZ

Nika ez, wazena na trêne berz bikerî, bê qisawet
Bê veng û vaj, bê qeza, bê bela, biercî asmên
Reyêna bê ters, bê xof, bikerî virara xo
La nêsikîna
Wa vindo
Domanê na suke ke hasar benê, hewnê rind û xirabî pey de manenê
Virnîya înan de rayê mektebî, kayê rindekî, ez bê welat
Welat bê mekteb, nika ez
Nika ez bê kes, qîrena, vengê mi vayan de herekîno, helîno, vîndî beno
Coka ke her roj nê seher û sukan de, mirena ez

Nika ez, wazena pêro kitaban û kitabxanan berz bikerî, bê afat û tofan
Bê derd û merezan, bê kifir û nifiran, biercî adirê hesretan ser o
Bivêsê
La nêsikîna
Wa vindo

Na bêvengîya sima, na lalîya sima, ez kerda budela
Nika ez, nameyê pêro welatan û seheran ser o wazena ronîsî
Pistîya xo biaznî awan û çeman, tayê dem, tayê dewran
Biarasî
La nêsikîna
Wa vindo

Ez bi xo nika yanê, nika ez
Wazena reyêna qayîtê albumê emrê xo bikerî
Zanena ke ne resmê domantîya mi, ne xortîya mi, nêasenê, çîn ê
Kewta dima rastîya xo, resta zonê xo nika ez, veng dana
Fekê mi de çekuyê belekî, rengê kamîya sewîye, wayîran ra vana
Se bî sima ra?

Nika ez….
Ax nika ez…
No hewno xorîyê înkar û asîmîlasyonî yo ke sima tederê
Ez endî çi wele ro xo ra bikerî?
Nêzana ke ez se bikerî

Nika ez, wazena na Dinya berz bikerî, bê zerar û qerar
Bêkamîye û bêhesasîyetîye ser o dêm bidî
La nêsikîna
Wa windo

Nika ez
Xo rê ju kilama kirmanckî vajî, jumektuba kirmanckî binusnî
Bêadresîye û bêkesîye ra birusnî

Ilhami Sertkaya