No, qeder nîyo, qebul mekerê
Astrolog, nezdîyê hawt rojî ke asme de mendbî, ameyabî ‘cêr’, ameyabî Dinyaye. Ebe nê astrologî roportaj virastê. Mi wend, bala mi yew nuqte antbî. Astrologî ropertaj de, cayêde vatbî; ‘asme de, mi ke qayîtê Dinya kerdêne, ne sîndorî, ne welatî, qet çîyê nêasêne. Uca de ez fikirîya ke, seba herbî, xirabîye, dismenîye, qet çîyê hewca û lazim nîyo. Ez reyna fikirîya ke, pêro mordemê xiraban ke birusnê asme, îta de qayîtê Dinya bikerê, ez bawer kena ke, ê zî naye fam kenê û pêro xirabîyanê xo teriknenê’. Wa roportaj uca de vindo, mi xo bi xo va ke; ‘ de bira gorî, ma kotî ra nê pêro mordemanê xiraban birusnime asme?’.
Seba ke ‘însano ewladê însanî’! Na rastîye fam bikero, hewca nîyo soro asme, tayê biaqil bo, bes o. Ez rind zanena ke, zaf kesî, na rastîre bizanê zî, seba menfaatê xo, xirabîye dewam kenê. Ma gelo Erdogan nêzaneno huzurê Heq-Homayî de yew ziwan qedexe kerdene, ê ziwanî de perwerde bîyene qedexe kerdîs, guna wo? O nêzaneno ke; sarî bomde kerdene, ebe barê giranan çekan fanatîkan ra nimite rusnayene huzurê Homayî de guna wo?
Qet merak mekerê ‘ her kes her çî zaneno’, la tayê çîyê muhimî estê ke, ‘ma’ nêzanenîme;
1- Eke Amerikayî de mebîyêne, Kobanî, rojavayê Kurdistanî, kewtêne destê ISID ê zalimî. (de vajê ke rast nîyo)
2- Kobanî û rojava ke saye koalîsyonî raxelesîya, PYD yî, bayraxa Kurdistanî ney, ê partîye berz kerd. Kamê ke bayraxa Kurdistanî berz kerd, PYD yî erisê înan kerd. (Kursitanê rojavayî ke, tarix de wayîrê ruhê kurdistanijî bîy, kamî û kamejî kayî nê sarî nîya no ruh ra ant, zanîno)
3- Ewro ‘kanton’ vanê, ma meste? Herbê Surîyayî ke biqedîyo, sima o waxt bivêne, nê ‘kantonî’ benê çi? (Xora serekê PYD yî vanê ‘ma Surîya lete nêkenîme, ma rê dewlete lazim nîya. Ebe no hal, ma peynîya to vênenîme hal û ahwal)
4- Gelo sarê Kurdan, seba Kurdistanî handayê bedel da û danê ya, seba sexsan û partîyan? Eh! Nika helbet sima pêro nê cuwabî danê ke ‘sarê ma seba Kurdistanî bedel da û danê’ la verî sima xo xapnenê. Sebep? Her çi verê çiman der o, keko!
5- Hîris serre ra zêda yo ke, sêneyê Kurdistanê vakurî de gonîye risîna. Dewî tal benê, kêyeyî we sasînê, gocberîye dewam kena, nufusê nê sarî bi mîlyonan vila bî. Her çî vurîya, la herbo ke qet yew mezra ranêxelesno, serdarê înan û serek, nêvurîya. ‘Serekî va çî na partîye henî kerd. (Serekî çi nêva ke?)
6- No sar, guna wo. Ebe xendekan, domanê nê sarî, kes ‘mexendekno’, heyf o, guna wo.
7- Ma, herbî zî zanenîme, hastîye zî, bira! La no hal, ne halê herbî yo, ne halê hastîye yo!
8- Eger ke ma na Dinya de, wazenîme bibime wayîyê serbestîya xo, heq û edaletê xo, wayîrê dewleta xo, ma rê di çîyî lazim ê, zêde ney; A-eeb ruhê netwîye, yewbîneya xo virazime, yewbînî ra (juminî ra) hesbikime. Ziwanê xo, ebe nê ruhî bisuxulnime, qisey bikime, candar bikime. B- Hedefê ma, çareyê ma, dewlet bîyena ma wa. Kamî ke naye qebul nêkenê, (eke dismenê Kurdan ê, xora dismen ê, eke kurd ê, wa canê înan ra cennem!Gos medime înan. Wilay kesê ke bi nameyê ‘welatperwerîye’! Gos danê înan, guna xo çîn a)
9- Soresvanîye xirabkerdene ney, virastene ya.
10- Sîyaset ke, cayêde xemetîya, vurîya, eke bî qilêr, eke kayê qilêrî kewto ci, ê siyasetî biteriknê.
Mi, nînan va û endî sima û bi aqilê xo.
Ma nêsikîme her kesî beme asme…
Eke xêrxwazî estê, ê gereke ma berê asme..
De na Dinya de (hata ke dewleta to çînî bo) kam ma se keno ke? Qîmetê ma çîn o.
No hal û merhale, qederê ma nîyo, qrbul mekime.
Ez endî çi vajî? Se vajî?
Ilhami Sertkaya