QAYÎSÊ APÊ MI
Apê mi, dewij, belengaz, feqîr, milayîm bî.
Nê sîyaset, nê halê Dinya, ne serebutê seher û sukan, bi vateyê ey ‘kar û halê telebeyan’ nêzanitêne.
Nê hukumat, ne dewlete, ne mudur, ne alim, ne mailim…
Nêzanitêne..
Hal û îdareyê xo de , Karêr de, dewa xo de, çînîbîyene de, risqê xo vetêne.
Destê xo vasturîye de, kemer û wele de, qurmýçikîya bîy.
Eskerê Tirkan, rojê ebe vîst dewijê Karêrî, bê sebeb,kerdî cemseyan, berdî suka Çewliðî.
Uca de, apê min ê belengazî, ebe îskenceyan kist.
Komutano ke apê mi kisto, hîna wes o, hîna silametîye der o.
Komutano ke nameyê xo Durmus Çoskun Kivrak’ o, zaf kesî kist bî, her çî zelal o.
Çiyo ke zelal nîyo; însanîya însanan a.
Çîyo ke zelal nîyo, qaso nê kesê ke meydanan de pila-pile kenê, ê yê.
Apê mi yo belengazo ke Tirkî nêzanitêne, cendekê xoyê gonînî, vêsayê Çewliðî de, betonan ser o, bê veng dêmdîya bî.
Dejan ra merd bî.
Sewa tarîye de, Çewlig de silîye varêne. Xebere ke ameya pî û maya min a belangaze, kewtîy raye, kolan û kuçanê Çewliðî de, ver bi bîna eskerîyayê Tirkan ancîyayî. Der û dormeyê înan de, eskerî vinete bîy. Seba ke komutanýo ketilkarî zanitê ke maye û pîyê mi yêne, xora amade bî ke, înan bixapno, bê qisawet, meyîtê apê mi, bikerê mezele. Komutanî pîyê mi ra ‘Sarreyê sima wes bo, birayê to, xo ebe qayîs, xendeqna’. Eke nîya va-nêva, helbet na zurekerîye ra pîyê mi qîra û ‘ birayê mi qey xo bixendeqno? Meyîtê birayê mi kotî der o? Ez bivênî’ vano. Komutan fam keno ke kes nêxapîno, eskere bi qîrayê vano;
‘Cayêde mevajê, sima vajê zî fayde nêkeno! Ez dewlet a! Kokê sima ana!’
Helbet rast vat bî.
Ebe cemseyan, meyîtê apê mi, berdî dea ma de kerdî mezele.
No komutano qetilkar sax, sima silamet!
Xalê min ê belengazî zî eskeran kist bî, o zî sax, sima silamet.
Gelo ez qey nînan nusnena? Kamî ra nusnena?
Mi qalê ‘qayîsê apê xo’ kerdêne.
Serran ra tepya, rojê Xarpit ra dewlete ra xebere yêna, xebere de nusîyo ke ‘Qayîsê merhumo ke xo intîxar kerdo, amîrîya ma der o, wayîrî sikînê bêrê berê’!
O qayîs, adrêsa bêdewletîya ma, bêçareyîya ma wo!
O qayîs, Singal de, Kerkuk de, Erbîl de, Dihok de, Silêmanîye de, rest wayîranê xo.
O qayîs, kotî de ke, alaya Kurdistanî berz beno, uca de, rest û reseno wayîranê xo.
O qayîs, hîna Bakur de, Karêr de, Çewlig de, xartpit de, Dersim de, nêresto wayîranê xo.
Wa kes ma ra qalê bêdewletîye mekero, pila-pile mekero!
O qayîs, vileyê bêdewletîya ma der o.
Mi coka nusna.
Zerreyê mi pir o, pir!
Sima mi ra qalê çi kenê?
Ilhami Sertkaya