RUEJA NEWÎ
Suphi Aydin
Rueja newî bî nizdî, teyna hîri sowyona pê bena berz sêr kuêyon welat ma ra. Tîja germin û ya bi bereket. Na tîja sîrin û delal yow felqê ‘ letê welat ma ser ra darena wi horan sîeyon, tarîtî kêy xwi azmîn ra bar ken sen. Eyi hor siey ko se hezar cinî, camîyerd, qij û kal ma kist pê kîmyavarona, enfala hin bên vila sên nimonên ni pêr – hêt welat ma ser di. Nîe Berzan ser enfal, nîe Helebçe ser kîmyavaron û nîe zî Sengal ser tertele û qetlîam bên hin. Na tîja newî û bi bereket ver di sar welat ma yow dilîg û dezgow rastkîn non rue, nîzam û edalet ben sêrîk emir yin. Nîe zulim monen ica di û nîe zî neheqê, teyna deyrê serbestîyê, azadîyê û yê wirîeameyis yena vatis. Pêynî feqîrê û neçarê yena ica di û herkes ben wayêr welat xwi. Sar welat ma yê hêt verruêj – basûr di hin ben serbest û azad, xwiser û serfîraz. Ben wayêr kar, gurî, îlîm, zanko, bax, baxçi, mal û milk. Herkes xebat ken qay versîyayis cîvat û welat xwi ya û pê zerrê xwi kên sa.
Dunya alem pê hesîya ya ko, 25. 09. 2017 di sar welat ma yê hêt basûr – verruêj fecîr sêr sibay ra yi ro hon sîrin ra wirzên wi û ref bi ref, qefle bi qefle sê way û birayon, duêst û embazon sên sandûqê rayon ser û qay xatir cuyayis serbestê û azadîyê ya rayê xwi don, von ê, ma hin nîwazên bindestê, ma dewleta xwiser yê Kurdîstan wazên. Kurdîstan azad hesrêt zerrê kal û pîron, xuêrt û kêynon ben heqîqet, ben rastkîn vîst û poncê asmê Eylul ra pê.
Çond sê serro ko merdim welat ma qay na rueja newî, delal û zelala xebat kerda û guêynê xwi rijnaya semêd azadîyê welat û mîlletê xwi ya? Çond girong yin sarri wedarit verbo zalim û zuardaron di, serasêr welat di xwiverda kot cergon û pîyerdayison ko yow ruej cuya ver xwi, zûrêt xwi, qij û kulfêt xwi azad bîk na bindestê ra. Yi kot sêr kuêyon, vêsonê, têysonê dî, vor û varon vara yin ser. Tay yin ra kot hepson tehdayê, îskence dî, sow û ruej amê kuayis. Tay zî mal, milk xwi ra, pês, dewarê xwi ra, bax, baxçê xwi ra bî, remay sî bî macîr dûrgelon. Milletê ma kurdan zaf ruêj têng û tarî dî, xirabê çay pîyesîr yin vera nida, bî xizmekar, kole û bindêst sar.
Ma qalê kam qetlîam û tertelon bik, yow nî, didi nî. Sêx Seîd, Seyîd Riza, Qazî Mehemed, Mela Mustefa Barzanî û hezaron ra sehîd Kurdîstan. Teyna Kurd zî namê qetilkerdis ni welat di, cîran ma Ermenî çay? Çi zulim ami Suryanîyan ser? Çond girong terteli û ferman Kurdan ma yê Êzîdîyon vêjîya û kêy yin kerd xirabi? Nizdê yow Mîlyon û nîyem Ermenî serrê 1915 di amê kistis û nîo zî bî macîr dinya ra bî vila sî. Herçiqas yi pê ferman dewletê Osmanîya û pê deston eskerona amê kistis zî tay kurdon ma zî pêr – hêt dewlet guret û bî qetilkar cîranan xwi. Helbet xêlek Kurdan zî Ermenî queri kêrd, bêrd kêyan xwi di nimit niverda yi bîyêr kistis. Merdim hol, zerr pak û bi merhamet mîyan her qom di êst û hê xirab zî. Na mesela gerega mar bib yow ders ko rayna çîko naterîn mîyon sar welat ma di meb. Zulim kam het ra yen wa bîyer gerega ma zuardarê qebûl mek û verboci sarri wedar.
Kurdîstan welat dewlemend, bi bereket, la heton nikay sar ma dest ra guretib koledaran. Hin dinya bedelîyaya bîya nerm, bîya hera. Teknîk zaf ver su û hayê herkês yowbînan ra esta, merdim bî wayêr îlîm û zanayê, bî demokrat û medenî. Teyna top û tufeng peri nikên, nikay aqil û fikir, rindê û holê lazima ma merdiman rî. Ma zî wazên bîe guên rijnayis, bîe cerg, pê sîyasêt û fikira bires miraz azadîyê xwi û welat xwi bixelsin bindeston ra. La herçî haw çiman verdo,hema hêt welaton serq di tay dewlêt êst sê vergon sêr kuêyon har û hov mênd, heywan yin ra nêrm.Turkîya, Îran, Îraq û Surîya di nîe demoqratê esta û nîe zî yow heq, huquq merdiman. Teyna kistis, hepis kerdis û zulim est nî welaton di. Welat ma zî mîyon nî vergon haron di bû leti – leti û yin ra her yow dewleta koledar yow felqê erd welat ma pê zuara guret xwi dest, sar ma zî kerd bindest.
Ereb, Fars û Tirk von ma musilman û sima zî biray mayê. La yi sow û ruej zûr kên von nîe Kurdîstan est û nîe zî heq kurdan. Von, kurd wazen welat ma parçek, la çaw welat kurd? Kam welat kurd kerd çahar parçi? Se serro ma hay bin zulim nî dewleton di nalên û kalên. Narê nî serron peyînan di daes amê bî belay sarrê sar welat ma, yin hezaron ra cinî, kêynê, qij, camîyêrd ma him bêrd kist û him zî sê koleyon bazar di ruêt ereban. Sinî wîjdan merdim tehmûl nî guron pîson bik? Na semed ra yow hêt welat ma di Pêsmergê qehreman verbo nî wahsî û hovan yow cergo gird da û sikir pastê nî murdaron sikit, yi Kurdîstan ra fetelnay. Êr serasêr dunya di hemi kes Daes ra tersen, çunke guron pîson kên. Nîe Ewropa verdaya û nîe zî Afrîka merdiman kisên, mal milk sar talan kên. La sikir Humay ra Pêsmegê ma verbo daes xwiverda û yi fetelnay welat ra.
Na semed ra dinya – alem qedr û qîmet dona Kurdan, pê camîyerdê yina bena sa. Eger ma zî xwi û welat xwi ra hes bik, rueja newî û ya bi bereket ha pawena ma. Emir wes û welat rind, dewlemend haw pawen ma. Ma gon bizon nanê xwi sê birayon pîya bar bik û yow cuyayis demoqrat, medenî pê destan xwi ya viraz ko, heton hetayî zerrê sar welat xwi pê sa bik.
22.09.2017
Wendox delal; ez wazena na meqaleyê xwi ko mi hîri sêrr cuya ver sêmêd referandûm basûra nûsta, la hema cay di nesir nîkerda sima rî pêskês bîk!
Suphi Aydin