SIMA QAY ÇINAYA VERBO SERBESTÊ KURDÎSTAN VÊJÎYÊN?

Serokatîyê kurdan yê Îraq qerar daw ko em serr vîst û poncê asmê eylul di suêr sandûqê rayan ser û sar hêt na heremî ra pers bîk, gelo yi yow dewleta – welat xwiser wazên, nîo zî nîe! Na xeber hemi tebaqa û hetanê kurdan di yow heyecan û kêyfoke gird peyda kerd. La Turkîya di xêlek ca û heton ra semêd na mesela nîerehatê, hesûdê peyda bî, yi nîwazên kurd bibî wayêr welat xwi yo serdest. Sebeb çiko, gelo nî kês, hêt wastê xwi di maqûlî, wayêr heq û edaletê?

Na meselayê kurdan Îraq ser dewlêt cîran yin û yê Îraq xwi dejnên û von zerar Kurdan resen ma. Turkîya di xêlek hêt êst ko kurd nî û wayêr zon, dîn cîya bi cîyanê yi zî nîwazên heq kurdan bibo. La ma zon ko em serr vîst û poncê asmê eylul di na mesela bena heqîqet û kurd sên sandûqê rayan ser. Madem ko hal û ehwal ino, ma binê mîyêl xwi bid na nerehatê ser ko bizon rastîyê nî gurî esta, nîo zî çîna.

Eger ma musilmanan tirkan ra pers bik, yi von ni gurî zerar don ûmmetê ma. Ûmmetê ma bena leti ‘ perçi, na dewletê kurdan ni mintiqa di kuena bin destê dewletê Îsraîl û Îsraîl Kurdan don xwi desta, Barzanî xwi ra esil xwi di Yahûdîw û nî pîlan yi yê. Vatê musilmanan tirkan ino, yi ona fikirîyên. Laykîm yi pê nî vaton xwi ya kên eskera ko yi çuqas tarîh û sosyolojîyê na mesela ra kot dûr. Musilman tirkan zî û bîe dîn yin zî derhêq na meselay kurdan di wayêr fikir musterêkî û nîerazî bîyayis yin zî yow fikir ra peyda ben. La ni waxt di hal û ehwal na mintiqa haw vêr çiman do û îtraz yin zî bîla sebeb, bîlaheqû.

Meselay netewîyê kurdan û dîn gon kî mîyar verbo yowbînan, ni qeyde ra nîe dîn rî û nîe zî realîte rî yow faydê xwi çîn. Guerê fikir ûmmet niben hudûd binatera bîyêr wedartis, heq û huqûq eyi kesan kî tebêr ma di ca gên yin rî gan hurmet bîk. Sedan ra serro ko kurd bîe heqê û neheqê vînên, kî senî esken suer yin ra vaj; serbestê semêd sima çîko zaf xiraba? Helbet kurd na qisê, qal ra xû ken û ti ra alerjî gen. Lazimo ko ma yow rewsa rind viraz û pîya sê birayon emir bik. Gerega ma nî fikir pîya cuyayis ca meverd. La nîben ko helag kurd yow heq teleb kerd, ma vaj ni ‘ fesadê Sîyonîstan a’. Rasta zaf zuar yow meselaya ko ma besk wayêr nî fikir sabît û nîemunasîb ra derdî xwi vaj, la ma mecbûr kî yin rî îzah bîk, rastê bîyar vêr çiman.

Ayi cayan di ko kurd tedi cuyîyên ponc dewlêt hukûmdar rî û pîyerûn di zî heq kurdan bi tewiroko adîlane çareser nîbû. Turkîya di fobîyê Barzanî raya verîn hêt Turgut Ozal a amê sikinayis. Awi waxt di nî gurê pê hot beran di nîe eskera amên kerdis. Cuya pê her kes pê hesîya ko çiqas yow xebata rast bi na sîyaset. Nikay wastê kurdan semêd xwiserî yow nîerehatê mîyan taynan di virasta, la çow nesken verbo hukûm tarîh di vindir, her çî waxt xwi di resen miraz xwi.

Lazimo ko ma îtîya pers bik; eyi dîndar Erêb, Tirk, Faris ko von; semêd ûmmeta virastis dewlata natewî ya kurdan ziraro, qay çinaya eynî fikir xwi derhêq bîyayis dewleta Ereb, Tirk û Faris di queri nikên, çay verbo dewlatanê xwi nivêjîyên? Kam cay kitab dîn di esto ko, musilman wirz heqê dewlet bîyayis Tirkan re biwaz û vaj guerê dîn ma dewletê kurdan nîbena, zerar dona ûmmetê ma? Merdim gan fikir naterîn ra xwi dûrfîn.
Ben ko yow qisim kurdan dewleta xwiser mewaz, la kî nesken vaj kurd rî dewlet çîko fizûlîyo, hetta yin rî dewlet çîko xirabo û ni fikir xwi ber dîna gire bid. Tabî nîe dîn di çîko naterîn est û nîe zî rastê heyat di ni fikir peri ken. Eger sima wazên dîndaran kurdan dîn ra dûrfîn, yin ra vajên eyî heq ko sobîna milletan rî estî, simar cayîz nîyî. Helag kurd zon mayê xwi di qisê, qal kerd pê razî nîyêbên. Sima von Kurd biray ma wo, la wa wayêr heq xwi nîyeb.

Sedan serro Kurd Mezopotamya di cuyên û xebatkar yow milleta, wayêr kultura, bîya sêwî yê ûmmetê musilmanan û sobîna tim zuardarê pê bû, qetlîyam yin ser virazîyay amê qetilkerdis. Gon kî hal û ehwal yin ra xwi dûr mefîn û nizdî ra fahm bik ko yi hay çi tengonê dê. Ger kurd bibo weyêr welat xwi, serq di huzûr û edalet peyda ben. Kurd namê na dunya ko bindêst sarib. Qay çinaya sima verbo ‘ qarsû kurdan vêjîyên? Nî xeyalan ko sima on hembêr kurdan hin ca verdên. Ma pîyerû vînên ko vîst û poncê asmê eylula pê rews bena normal û kar yey resen ma pîyerûn pîya.
Ez bi xwi referandum ‘ ray çarnayis ko vîst û poncê asmê eylul 2017 di virazîyên rast, heq vînena û destek, past dona ci. Wazena ko hemi kes na derheq di fikrê xwi eskera biko, nuser, komal, partî usb.

Wendox zon ma yê delal, mi na meqale T24 ra, 28.06.2017 di guret û tirkî ra açarnaya zazakî. Awi waxt di mi zazakîyê nî nûstî wayêr yi Ömer Faruk Gergerlîoglu rî sawitib. Yi zazakî yê nî nûstî kêyapelê xwi di nesir kerdib. Nikay birêz Ömer Faruk Gergerlîoglu kot hepis û ez wazena tercûmeyê na meqaleyê yi newe ra nesir bîk û hêvî kena ko wi hepis ra yow ruej cuyaver xelas bibo. Sar welat mino delal zî wa rueja teng di merdim demoqrat sê birêz Ömer Faruk Gergerlîoglu rî wayer vêj!

Suphi Aydin