SIMA XO QEDÊNÊ, ‘PILA-PILE’ MEKERÊ!
Waxto ke ma hewnê serran de hasar bîme, ma dî ke ziwanê ma, kamîya ma, rastîya ma, binê bandura înkarê Tirkan der o. Ma dî ke, nameyê pêro dewan, seheran, sukan, neqeban, çeman, dar û kemeran vurnê kerdê Tirk. Ma zanit ke, na dewleta Tirkan, ebe di çîyan, wazenê ke na dünya de, ma biqedêne. Nê di çîyî; 1- Qereqol, 2- Mekteb.
Qereqol; bi zorê qewetî, mekteb; bi zorê ziwanê Tirkî.
Qereqol; can û cendek , mekteb; aqil û mezge ser o, hukim bî.
Qereqol; ver bi ma herb, mekteb; ver bi ma kültürê Tirkan bî.
Qereqol; ma ra mezele, merdene misnêne, mekteb; ma ra ‘Tirk bîyene’ misnêne
Hedefê qereqol û mekteb; merdena ma, qedîyayîsê ma bî.
Hîris serre ra dime, ma talan û weranîya herbî ant, înkar qedêna.
Eke înkar qedîya, raya ziwanî asa ke (ez bi xo) çi bivênî? Sima zî vênenê û zanenê ke, telukayo tewr girs, oxro ke, ‘qereqol’ ney, ‘mekteb’ bî.
HERBÊ DEWLETA TIRKÎ, MA NÊQEDÊNA, LA MEKTEBÊ ÎNAN, XORÎTÎYA ASÎMÎSYONÎ, ZAF MUMKUN O KE MA BIQEDÊNO.
Gelo, ez sas fikirîna?
Gelê wendoxan, zaneyan, ‘alim û maliman’, sima ke rastîye zanenê, mi ra vajê. Mi ra vajê ‘ti sas fikirîna, asîmîasyon, ma nêqedêneno’.
Omid bidê mi!
Vajê ‘ma ziwanê xo ra hes kenîme, misenîme, qisey kenîme”
Vajê; ‘ma binê tesîrê ziwan, medya û kitabanê Tirkan de vecînîme, ma ziwanê xo û kitabê ziwanê xo ra, edebîyatê xo ra hes kenîme, wanenîme’.
Vajê; ‘ ma endî bi ziwanê xo ra sîyaset kenîme, bi ziwanê xo ra aktîfîteyan, çalakîyan virazenîme’
Vajê; ‘ma bi ziwanê xo endî nusnenîme, bi ziwanê xo hunîme, berbenîme’
De vajê!
Eke nîya wo, heya, ez sas fikirîna, ma ke nîya nîyo?
Her çî, zelal, her çî verê çiman der o, wayê, bira!
Welat de ewro ziwanê xo qisey kerden, wendene, nusnayene qedexe nîyo, çend kesi ziwanê ma misê, misenê, nusnenê, wanenê, qisey kenê?
Ewropa de xora qet qedexe nêbî, çend kesî zanenê, misê û misenê, wanenê, nusnenê?
Endî kes nêsikîno vajo’ ziwanê ma qedexe yo, coka ma nêsikîme bimisime’.
No mane, endî qedîya, ma na raya ‘derdê sima’ çik o?
Musgulato ke seba ziwanê xo zanitene, misayene sima ra asteng o, çik o?
Ez sima ra vajî astengê sima çik o;
Astengê sima; mezga sima bi xo ya. Mezga sima de heskerdena ziwanê sima vecîyo.
Çi heyf ke, dewleta Tirkan, zerreyê sima de, heskerdena ziwanê sima veta!
Qet xo mexapnê, qet ‘pila-pile’ mekerê.
Na rastîya ecêbe, ê sima wa.
Sima qedîyê. Asîmlîasyonê Tirkan, sima kerdê asîmîlekarê ziwanê xo.
Endî hewca nîyo ke dewleta Tirkî asîmilê bikero, sima bi xo bîyê asîmîlekar.
Luzume ‘kahrolsin û yasasinî’ çîn o, xo mexapnê, sima qedîyê!
Ilhami Sertkaya