Wendoxê hêjayî!

No, mesajê min ê serra newîye yo ke wazena sima rê biwesênî;

Dinya, welatê ma, sarê ma, endî serra 2014 î vîyarnenê, dest kenê serra 2015 î.

Çi hêyf ke, sarê ma, zê zaferî saran û welatan ê bînan, bi sabîyene na serre zî nêvîyarna.

Îslamê fanatîk û gonîwerî (DÎSI), ebe xêderîya xo, erisê sarê ma kerd, zaf cayan de, sarê ma qir kerd, gonî risna, dewan û seheran wêran û talan kerd. Kurdistanê basûrî de, pesmergeyê qehremanî ver bi nê xêderan û zaliman bi qehremanîye herb kerd. Gorê zanyarîyan, heta nika mabênê çar asmî de, 727 pesmergeyî sehid , 3564 kesî zî dirbetin bîyê. Pêsmergeyî pistî dayî cengewarê Kobanî, nê seherî, fanatîkan de seveknayî, xelas kerdî. Pesmergeyî ebe cengawerê Kobanî quwetê xo kerdî têser, bi qehremanîye ver bi dismenanê Kürdistanî de herb kerd. No, seba yewbîyena quwetê Kurdistanî, zaf wes û muhim bî. Hesreta sarê ma yê yewbîyene ra, moralê sarê ma tayê berz kerd.

Dewleta Tirkan û kemalîstan, çiqas ke planê qilêrî sarê ma ser o virastî zî, besekar nêbîyî, nê planê qilêrî gewrîya înan de mend. Dewleta Tirkî, yew het ra bi nimite pistî da nê fanatîkan, yew het ra, ‘merhale*sureç’ ramit. Erdoaganî, bawer kerdê ke, nê îslamê fanatîkî, Kobanî dano war ra, keno binê destê xo. Coka ke bi kêyf vatê ke; ‘Kobanî, ewro-meste keweno destê DÎSI yî’ . La no kêyf, pirnika Erdoganî ra ameya.

Serra 2014 î, Kürdistanê bakûrî, bi giranîye, reyêna ebe planê ‘merhaleyî-(sureç)vîyarna. Qet çîyê nêvurîya. Peymanê Hewlêrî yo ke seba yewbîyena Sarê ma yê bakûr û rojawayî, helbet seba pêro Kuristanî bixêyr û muhim bî, çiqas ke tayê ‘destê qilêrî’ verî wastî ke bixemitnê, dime ra axir reyêna bî candar. Saya nê peymanî de, ewro ver bi dismenan,yewbîyena bakûr û rojawayî gamê rindî ercîyê. Dewleta Amerîka û Ewropayî, pistî dayî hukumatê Kurdistanê bakûrî ke, no zaf muhim bî. Ma reyêna sahîd bime ke; EKE MA YEWBÎYENA XO MEVIRAZIME, PISTÎ MEDIME YEWÎNE, KES MA RÊ NÊBENO ‘YAR’, MA BÊ ÇARE MANENÎME, VILA BENÎME ‘DÎYAR BI DÎYAR’.

Axir nê belayê fanatîkê îslamî DÎSI, Kurdistanê basûr û Rojavayî de xêylî def bî, pesmergeyê qehremanî, Sengalî raxelesnayî. Na mizgîne, Serek Mesut Barzanî bi xo da. Serdarê nê operasyonê girsî zî Mesut Barzanî bi xo bî.

Yew het ra qir kerdîslê sarê ma, yew het ra serkewtîsê cengawerê Kürdistanî.

Hem xem, hem sabîyene.

Ma , binê nê hîsanê ser û binî de, serra 2014 î vîyarna.

WENDOXÊ HÊJAYÎ;

Qet yew kes, partî, ideolojî, welatê ma Kurdistanî ra zêde muhim nîyo. Kurdistanî mekime qedayê sexsan, partîyan, ideolojîyan; sexsî, partîyî, îdeolojîyî, rojê ney, rojê waxtê xo yênê mirenê, la Kurdistan maneno. Ebe nê fikir û mantîqê welatperwerîye, seba dewlet bîyena Kurdistanî, seba netewîya azadîye û demokrasîye, bibime wayîrê toleransî, bixebetîme. No, ma pêrune ra lazim o. Veng û rengê ma çi beno-bibo; bê Kurdistano azad û demokrat, çareyê ma çîn o. Ebe na rastîye;

Serra newîye ya 1015 î, ma rê, sarê ma rê, welatê ma rê, serkewtîs bîyaro.

Serra newîye ya 2015 î, plan û sîyasetê bê fayde û qilêrî, sarê ma ser o durî bikero.

Serra newîye ya 2015 î, hesreta ma biqedêno, yewbîyena ma bîyaro.
Serra newîye ya 2015 î, Kurdistanî rê xêyr û sabîyene, mizgîne bîyaro.

Serra newîye ya 2015 î, miradê sima bîyaro, hesreta sima biqedêno.

Bi nê wastîsan, seba serra sima ya newîye, bi can û bi zerrîya xo vana ke;

SERRA SIMA YA NEWÎYE, FÎRAZ BO!

Ilhami Sertkaya