XO MEXAPNÊ, XO RÊ XIRABÎYE MEKERÊ!
Ne xo rê xirabîye bikerê, ne zî sarê xo mexapnê! Ez ke sima ra pers bikerî ‘dawa sima çik a’, sima zaf kesî vanê ‘dawa ma serbestîye welatî ya, serbestîya kamîya ma wa, serbestîya zonê ma wo’.
Henî nîyo?
La sima wayîrê nê vateyanê xo nêvecînê.
Sima Vanê ‘zon’, la sima bi xo, zonê xo nêmisenê, nêwazenê bimisê!
Sima vanê ‘serbestîye’ la sima bi xo zaf ‘serbest’ nîyê.
Sima vanê ‘demokrasîye’, la sima bi xo tehamule fikranê bînan nêkenê!
Sima vanê ‘ma tabuyan nêwazenîme’, la sima bi xo tabuyan virastê!
Sima vanê’ ma verba asîmîlasyonî de yîme’ la sima bi xo bîyê asîmîle û xo zonê asîmîlasyonî de nêvisnenê!
Sima vanê ‘ ma wayîrê zonê xo bivecîme’ la sima bi xo wayîr nêvecînê!
Gelo sima bi zonê xo ra ju kitap wendê? Nas kenê? Sikînê biwanê?
Ney!
Sima roje de ebe kirmanckî, ebe zonê xo qisey kenê ya ebe zonê asîmîlasyonî?
Sima ebe domananê xo ebe zonê xo qisey kenê ya ebe zonê asîmîlasyonî?
Astengo ke sima zonê xo bimisê, qisey bikerê esto? Ney! Ma qey sima bi zonê xo qisey nêkenê, nêmisenê?
Sebeb?
Ebe nê halê simayê ecêbî, ez se sima ra bawer bikerî? Ez qey bibî tabîyê sima?
Sima nê nusneyê mi wanenê?Fam kenê? Ney!
Ma sima ke nusneyê mi yê ke bi zonê ma wo, nêwanenê, fam nêkenê, ez qey ebe sima bî?
Sebeb?
Seba ke sima mi biwanê, fam bikerê, gereke ez bi zonê asîmîlasyonî, bi zonê Tirkî binusnî?
Ma zonê ma?
Sima ke zonê xo nêmisenê qalê kamcî ‘asîmîlasyonî’ kenê?
Xo mexapnê!
Zon ke çînî bo, sar zî çîn o!
Zon ke biqedîyo, o sar zî qedîno!
Sima verba qedîyayîsî sonê. Ez nê ‘kayê xirabî de’ çîn a! Edebîyatê sima, vateyê sima, sloxan û ‘tujîya’ sima, qet fayde nêkeno.
Ez, xo nêxapnena, sarê xo zî nêxapnena!
La sima? Sima hem xo xapnenê, hem zî ‘sarê xo’.
‘çilo-pilo’ mekerê, ez sima zenena!
Faydeyê ‘yasasin û kahrolsinê sima’ çîn o!
(Wendoxê ke nuseyê mi wanenê, fam kenê, zanenê ez qalê kamecî tewîr însanan kena)
Ilhami Sertkaya