ZERYA

Destê xo derg kerda, bilûra xo girota
Temezîye por ra ney, mîyane ra girê da
Awiran verba gileyê koyan ravirda
Rengê adirî bi veng, bilûre ra vecîya
Barî, tenik, nerm vecîya
Lêvê xo zimeyê verê pukeleke bîya
Rutîya verojan, hîtîya hazazan bîya sêneyê xo
Azebe bîya Zerya
Wastîya kamîya belekan a
Sukan de visîya, dewan de risîya
Rojê hesreta welatî kerda zerreyê xo
Vane sewan dêm da, sîndoran dirna
Sîya
A roje ra nata
kilamî ebe miqamê xo aqilê mi kinenê
Silamî hewrê xeribîye zimnenê
A roje ra nata
Bêwelatîya min a Zerya

Nika Dêrsim de silîyê gewrî warenê Zerya!
Karêr de rayî berbenê
Kayê mixenetî nika
Domanî visîyê kamîya xo ra
Dima to ra
Dima to ra Zerya
Ez bîya araq, awan ra sîya
Ax Zerya, Zerya!
Bêdewletîya mi Zerya!

Ilhami Sertkaya