KAYO NEWE
Weçîntîso ke emser di reyî bî, qedîya.
Hesab û kitabî, dewam kenê. Manîpulasyon û rojevê serebutî, kelecanîyê sasî, kerdê lastik, kamî ke nê kayî de, nê lastikî çiqas ke ant. Cêr û corê medya û rojnameyan, televîzyon û radyoyî, kêyepelg û medyayê sosyalî, ebe nê hesaban û nê rojevan, gurma- gurm ê.
Qet sareyê xo medajnê.
Nê hastîye, ne herb, ne sukutîye, ne çareserîye..
Qet çîyêde zelal çîn o.
No hesabê weçînitîsî, hîna zaf dewam keno.
‘No miste, na awe, hîna zaf îdare keno’.
Ne xem bikerê, ne keyf bikerê.
Sebebê keyf û xem kerdene çik o?
Eger ke sima ebe sîstemê Tirkîya, bi weçînitîs, persê Kurdan çareser kerdene ra înam kenê, helbet ebe nêtîceyê nê weçînitîsî xem bikerê, la ez na sasîye ra qet înam nekena, coka seba mi zaf muhim nîyo.
La çîyo ke ez xem kena, est o;
Kamî ke kerdê; kelecanîya xirab û çewte kerdê rojeva sarê ma. Bi nê atmosferê xirabî, sarê ma kerdê binê tesîrê rojeva lastikan.
Çi ke; qet nînan ra, prejeyê xo yê ‘çareserîya persê kurdî’ çîn a.
Ma ê HDP yî est a sima vanê?
Ney ‘keko’ ney, çîn a. Hata nika sima sikîne nameyê wastîsê esasî yê na partîye bimarê? Zaf bî, seba ke ‘zaf bî’, çîn a. Musrafa Karasu, dima weçînîsê peynîye de hîna vano ‘demokrtîk ulus’.Tayê vanê ‘ozerklik’.Her kes gorê xo û gorê rewsa rojeve, gorê hal û merhaleyî, çîyê vano.
Heyf o, guna wo no sar.
No sar, qefelîya. Ya seba ‘demokrat bîyena Tirkîya’, ya zî seba dewlet bîyena Kurdistanî , wastîsê xo zelal bikerê. Eke sima seba ‘demokrt bîyena Tirkîya’ wayîrê planîyê, herbî cavirdê. Seba naye qet herb luzum nêkeno.
Cemîl Bayikî nê rojan çi vat bî? ‘Ma, AKP kerdêne ser û bin, serekê ma nêvirda’.
O ke sima vateyê serekê xo kenê, xo meqefelnê, sarê ma zî mexecelnê.
Ez nê kayî de, çîn a.
Nika zî waxtê sereketîya Erdoganî ya. Tayê waxt zî, ma nîya xecelnenê. La no mabên de, ebe nê halî, vîst serre dime bifikirê, o waxt halê ziwan û kamîya ma, halê rastîya ma se bena? Ebe nê ‘haybiro ‘û axirserî’, domanê ewroyî , yew nefso newe, ziwanê xo ra ‘kîpa-kîp’ durî benê, visînê.
Lemin, lemin..!
Bêrê ra xo!
Eger ke Kurdistan de, seher û sukan de, bazaran de, kolon û kuçan de, ziwanê ma bîyamêne qisey kerdene, xora AKP-MKP bi xo vîndî kerdêne.
‘Hal yaman o’.
Ez bi xo zî gege qalê ziwanî yo ke sebebe ‘bîyene û çînîbîyena ‘ ma wa, qalkerdîs ra ‘eciz bena’.
Sîyasetê ewroyî, seba ziwanê ma zî, çi heyf ke bîyo asteng.
Weçînîtîs de, bê HAK PARî, qet yew partîye,Tv yê dewlete de, ziwanê xo qisey nêkerd.
Gelo se bî ma ra?
Gelo sima hetkarê ‘zafîye’ yê,ya hetkarê rastîye?
Eger ke zafîye biheq bîyêne, welatê Çînî, dinya îdare kerdêne. Coka ke yew fikra esta, sima ra vajî;
Ýsviçreyî erisê welatê çînî kerdo. Xebere danê serekê hukumatê çînî, vanê ke ‘serek! Ýsvîçreyî herisê welatê ma kerdo, kewtê welat’. Serek vano;
-Kamejî otel der ê?
Eke senikîye ‘neheq’ bîyêne, Kurdistanê Basurî azad nêbîyêne. Nika zî ver bi dewlet bîyene sonê.
Helal bo!
Qey?
Çi ke, watîsê xo de zelal ê.
Gelo sima fam kenê?
Bi nameyê ‘stretejî û taktîkan’, wastîsê esasî ser o kay mekerê.
Ya heqê dewlet bîyena Kurdistanî, ya zî ‘demokrat bîyena Tirkîya’!
Hem o, hem no, nêbeno. Kes, kesî mexapno.
Ilhami Sertkaya