Pîrozkirina 20.saliya
Roja Nû

Kovara ROJA NÛ di roja 28 ê mijdarê da (1998) salvegera xwe ya 20-emîn û hejmara 100-emîn bi şahîyeke kulturî pîroz kir.

Di şahîyê da li dor 500 kesî beşdar bûn. Nûnerên gelek partîyên sîyasî, dezgehên civakî û kulturî, kovar û weşanxaneyan di şahîyê da amade bûn û gelek mesaj û silavnameyên pîrozbahîyê jê ra şandin. Redaktorê berpirsîyar ê ROJA NÛ Haluk Öztürk axaftinek pêşkêş kir û da xuyan ku organa KOMKAR-Swêdê Roja Nû peyrevekî kovar û rojnameyên kurdî yên berî xwe ye, wê bi rêberîya Özgürlük Yolu û Roja Welat daye ser rîyeke pîroz û bîst sal e li ser dimeşe. Wî di axaftina xwe da pîrozbahî da wan hemû kesên ku heta niha di derxistin û belavkirina Roja Nû da xwedî ked û par in.

Sekreterê giştî yê Partîya Sosyalîst ya Kurdistanê (PSK) birêz Kemal BURKAY jî amade bû. BURKAY li ser pêwîstî û hêjabûna weşanên bi zimanê kurdî qise kir û bi taybetî jî li ser 20 sal û 100 hejmarên kovara Roja Nû dîtinên xwe anîn ziman, û pîrozbahî lê kir. Wezîrê rewşenbîrî yê Kurdistana Başûr birêz Felekeddîn KAKEYÎ jî mesajeke pîrozbahîyê bi rêkiribû. (Hemû mesajên ku nivîskî gihîştine redaksîyonê di hejmara 100î da hatine belavkirin û li vir jî hûn dikarin bixwînin)

Serokê Komela Nivîskarên Kurd li Swêdê, Xelîl DIHOKÎ û şair û nivîskar Tosinê REŞîD jî axaftinên kurt pêşkêş kirin.

Di bernama şahîyê da hunermend şivan PERWER, Hesen şERÎF û ORHAN beşdar bûn. Van stranbêjên me yên delal bi stranên ji hev xweştir şeveke xweş pêşkêşî guhdaran kirin.

---

Axaftina Kemal Burkay

Sekretarê giştî yê Partîya Sosîyalîst a Kurdistanê

 

Xwîşk û birayên delal!

 

Ev civîna me ji bo 20 saliya Roja Nû ye. Roja Nû her usa jî bi hejmara xwe ya dawî digihîje sed hejmarî.

 

20 sal ji bo kovarekê demeke ne piçûk e. 100 hejmar jî hejmareke gelek taybetî ye.

Hevalan jî gotin û qasî em dizanin, Roja Nû kovara here emirdirêj e bi zmanê Kurmancî. Eva jî serbilindîyek e bo wê. Berî wê gelek kovarên edebî, çandî û sîyasî derketine û pişt ra emrê xwe temam kirine û ji warê weşanê vekişîne. Lê pişt ra kovarên dinê derketine.

Her rojname û kovarekê di warê çand û sîyaseta Kurdî da rola xwe lîstîye, tevî xezneya çanda netewî bûye. Rola ku Rojnama pêşîyê, Kurdistan û Hawarê lîstine, gelek giranbuha ne.

îro tenê li Swêdê bi dehan kovarên Kurdî derdikevin û bi dehan weşanxane kitêbên Kurdî çap dikin. Swêd bûye wek gulbaxçeya çanda Kurdî. Ev yek ji bo Swêdê jî serbilindîyek e, ku wek welatekî demokrat firsend daye geşbûna zmanê me yê şîrîn ku di welatê me da qedexe ye.

Ez cara pêşin di destpêka sala 1979 da hatibûm Swêdê. Hatim û dîsa vegerîm welat. Hingê Roja Nû derdiket. Bi şiklê rojname bû û bi Kurdî û Tirkî bû. Çend sal şûnda bû kovar û tenê bi zmanê Kurmancî derket. Naverok jî bi giranî çand bû.

Di van bîst salan da gelek hevalan di derxistina Roja Nû da kar û xebat kirin. Ango, para gelekan tê da heye. Di van bîst salan da hinek heval çûn û yên teze hatin. Heval Haluk yek ji wan hevalan e ku ta ji destpêkê heya nuha di derxistina kovarê da xwedî pareke giran e. Bi sebir û bi îstîkrar karê xwe ajotîye û heya îro anîye. Ez wan hemû hevalan ku di derxistina Roja Nû da para wan heye, û xasma jî Haluk pîroz dikim.

Karê çandî beşek e giranbuha ye ji şerê me yê rizgarîyê. Dijminê me, çiqas ji dest tê, dixwaze zmanê me, çanda me bikuje, winda bike. Lê rewşenbîrên Kurd, hunermendên Kurd û dengbêjên Kurd bi salan e, bi sedsalan e bi camêrî berxwe didin, zmanê me yê şîrîn û çanda me didin jîyandin û geştir dikin.

Ev xebat di avê da naçe. Tovê berê rijandî nuha geş dibin. Li ser kar û xebata îro jî, şik tune, subê bax û baxçeyê teze avabin.

Ez careke din ji bo bîst salîyê û ji bo gîhiştina 100 hejmarî Roja Nû pîroz dikim, jê ra emrekî dirêjtir dixwazim.

---

Pîroznameyên ku ji şahiya 20-saliya ROJA NÛ ra hatine şandin:

 

 

KOMKAR

Yekîtîya Komelên Kurdistanê, komîteya birêvebirina giştî

 

Ji redaksîyona ROJA NÛ ra!

 

Hevalên hêja, berî her tiştî em ji bo dawetnama 20 salîya kovara ROJA NÛ û hejmara wê ya 100-î, ku we ji me ra rê kirîye, pir kêfxwaş bûn. Ji ber wê yekê em pir sipas dikin û serkeftina we dixwazin.

Hevalên hêja!

Di hebûna gelan da çand, huner û edebîyat cihekî gelek giring digrin, lê ew tiştana bo gelê bindest diha giring û bi rûmet in. Ji ber wê yekê jî karên ku kovara ROJA NÛ 20 sal e bê westan dimeşîne û gihîştîye hejmara xwe ya 100-î, karekî pîroz e. ROJA NÛ têkoşîna gelê kurd xurt kir û rûyê dijminan reş kir. Li alîyê din em baş dizanin ku pir kurdên welatparêz bi saya xebatên ROJA NÛ fêrî xwendin û nivîsandina kurdî bûn. Iro hejmara wan kesan bi hezaran in. Li alîyê din va jî ewê dîrok û çanda gelê me pêşda bir, zelal kir û gel di alîyê çand û hunerî da jî hişyar kir. Ew ji wê ye, ku ewê siyaseteke rast û durust meşand. Îro li pir malên welatparêzên kurda pirtûk û kovarên ji weşanxana ROJA NÛ hene. Ew ji bo gelê kurd xezîneyeke mezin in.

Em careke din 20-salîya ROJA NÛ pîroz dikin û di xebatên wê da serkeftinê dixwazin.

Bijî ROJA NÛ!

 

 

Komîta Hevkarî ya hêzên siyasî yên kurd û Kurdistanî li Swêdê

 

Eva bîst sal e kovara ROJA NÛ ji bona vejîyandina huner, çand û edebîyata gelê kurd, ku kultur û edebîyata wî hatiye qedexekirin re, xebata edebî û hunerî dike. Îro şahîya bîst salî ya temenê ROJA NÛ û bi darêxistina hejmara wê ya sedê ye. Hêvîya me ew e, ku kovara ROJA NÛ bi kateke nêzîk de sersalîyên xwe li welatê xwe pîroz bike.

Em serketinê ji karbidestên kovara ROJA NÛ û karkerên wê re dixwazin.

 

Felekedîn Kakeyî, wezîrê roşinbîrî (kultûrî) yê herêma Kurdistana Îraqê, ji şahiya 20-saliya Roja Nû slavnameyek şand.

 

 

Bi navê Yezdanê pak

Bo birayên hêja: sernivîskar û redaksiyona govara xweştivî ROJA NÛ

Bi silavên biratiyê:

 

Germtirîn pîrozbahiyên xwe li we û xwandevanên ezîz yên ROJA NÛ dikim. Di karê we de serkeftinê dixwazim. Hêvîdar im her tim di xizmeta bizava rojnamegerî û ronakbîriya resen a kurdî de bin.

Ji salên heştêyan were ez ROJA NÛ dinasim, dema ew digihîşte destê min, ez pir pê kêfxweş dibûm, bi nivîsên wê yên çandî, nûçe û raporên kultûrî û wê ciwaniya pê derdiçû. Û hêşta jî bi eynî awayî û qewareyî berdewam e.

Di dema 20 salên pir şanazî de govara ROJA NÛ bi rêbaza xwe ya taybetî ku hêminî û aramî û li ser xwe ye, di warê kultûrî û rojnamegeriya me de, cihê xwe yê diyar û serbilind girtiye. Jiyekê dirêj bo ROJA NÛ dixwazim.

 

Her şad û serfiraz bin

Bijî kurd... Bijî Kurdistan

 

Birayê we - Felekedîn Kakeyî

 

şekroyê Xudo, serokê Navenda Lêkolînên Kurdî li Moskow.

 

Redaktorê bersîvdar yê kovara ROJA NÛ Haluk Öztürk

û endemên redaksîyonê!

 

Ji navê Navenda Lêkolînên Kurdî li Moskow û ji navê xwe bi dil-can û hesîna şêkirandinê we pîroz-bimbarek dikim bona 20-salîya ROJA NÛ.

Nava salên derbazbûyî da kovara we rêke layîqî pesinandinê qedandîye. Bi saya kar û zîrektîya we ya rojnamevanîyê goveka xwendevanên we fire bûye û hê jî dibe. Naveroka kovarê alîkarîyê dide xebata me ya azabûn û pêşketinê.

Dewra me da rola mas-medîyayê nava emirjîyîna gelê kurd da gelekî mezin e. Em gelekî kêfxwaş dibin, ku hûn bi femdarîke kûr xwe didine bin vê giranîyê.

Açixî û destanînên mezin ji we ra di vî karê pîroz da!

 

 

M. Alî Yildirim, serokê giştî ê Federasîyona HEVKAR (Almanya)

 

Hevalên hêja û xoşewîst!

 

Min nama we girt û bi nama we gelek kêfxwaş bûm. Wek hemû em dizanin, ROJA NÛ di dîroka gelê kurd da cîkî mezin digre. Bi piranî jî di qada edebî û kulturî da valayîke pir mezin tije dike.

Hevalên hêja û bi rûmet!

Bi rastî min gelek dixwast di şahiya 20 salîya salvegera ROJA NÛ û pîrozkirina hejmara wê ya sedî da hazir bûma. Lê mixabin ji ber hinek sedemên wext û kar ez nikarim di şahiya we ya xwaş û hêja da beşdar bim.

Carek din bi silavên biratî û şoreşgerî we pîroz dikim û serkeftin û serfirazî ji we ra dixwazim!

 

Partîya Dêmokrata Kurdistan (Iraq), liqê Swêd

 

20-saliya ROJA NÛ pîroz be!

 

Di demekî de ku 100 sal derbaz dibin bi ser derketina yekemîn rojnama kurdî bi navê Kurdistan, govara ROJA NÛ jî pir bi şanazî ve 20-saliya xwe diqetîne. 20 sal e ROJA NÛ xizmeta peyva resena kurdî, çand, kultur û hunerî kurdî dike, ji ber vê yekê jî ROJA NÛ rolek geş û berçav heye di bizava rojnamevaniya kurdî de, herwisa govara ROJA NÛ roleke giring dibîne di hişyarkirina netewî de, nemaze di Kurdistana Bakur de. 20 sal pir in ji bo govareke kurdî ku bikaribe jiyana xwe ya rojnamevanî bidumîne û kêm govarên kurdî hene ku hewqas sal pirkirîbin. Îro ji her demekê zêdetir gelê kurd pêdivî ragehandinek rêxistinî ye ji bo ku kurd bikarin doza xwe ya netewî bi cîhanê re bigehînî û wicê ji teknîka nûî werbigrin.

Tiştê ku lazime li dawiyê were gotin, ew e, ku ROJA NÛ di jimarên xwe yên dawîyê de gelek layenên veşartî û nixaftî ji çalakiyên hemereng yên kurdên Sovyeta berê eşkerekirîne û xwandevanên kurd li ser wan çalakiyan agahdar dike. Ji govara ROJA NÛ re jiyanekê dirêj dixwazin û hîvîdarin di karê xwe yê pîroz de serkeftî be.

Bijî peyva azad.

Nemirî bo şehîdên bizava rojnamevaniya Kurdistanê.

 

Prof. Zera Ûsiv, ji navê koma kurdzanîyê ya Enstîtuya Rohilatzanîyê ya Sankt-Pêterbûrgê (para Akademîya Rûsîyayê) û Popova Î. F., sekretara Enstîtuya Orîentalîstîk ya Akademîya Rûsîyayê

 

Ji bo redaksîyona kovara ROJA NÛ û redaktorê berpirsyar Haluk Öztürk ra!

 

Xebatkarên koma kurdzanîyê ya Enstîtuya Rohilatzaniyê ya Sankt-Pêterbûrgê bi dil û can cejna 20 saliya kovara ROJA NÛ pîroz dikin. Hêvîya me ew e, ku ROJA NÛ hetanî azabûna Kurdistanê jî bê çapkirinê ji bo xweykirin û pêşdaçûyîna çanda miletê me.

 

 

Keya Îzol, serokê Federasîyona Komelên Kurdistanê li Swêd

 

Li ser navê Federasîyona Komelên Kurdistanê li Swêd, ji bo vexwendina we ya şeva 20 salîya ROJA NÛ, sipasiya xwe pêşkêşî we dikim.

ROJA NÛ wek kovareke kurdî roleke gelekî giring leyîstîye û di vê rola xwe de karên xwe berdewam dike. Ji bo wan 20 salan û gihîştina jimara 100-î ez dixwazim we pîroz bikim, herweha serkeftin ji bo xebata we ya pêşerojê daxwaz dikim.

Di gel silavên germ.

 

 

Partîya Demokrat a Kurdistana Îranê, Komîteya Swêdê

 

 

Bo rêvebirên govara ROJA NÛ birêz

Bo berpirsyarê govara ROJA NÛ birêz

 

Rêyê bidin me, ku bi navê hemû endam û layengirên partiya me, Partiya Demokrata Kurdistana Îranê, bi helkeftin jimara sedê 100 ya govara Roja Nû, ji dil pîrozbahiyan li we bikîn. Û bêjinê we dest xweş û serkeftina we ji bo berjewendiyên gel û niştîman bixazîn.

Hevalne baş agadarin ku rojname û rojnamenusî di nav hemû gelan de, her wekî destpêka serhildanên wan, nîşana berev jor çûna hişyariya netewî ye. Berdewambûn û geşbûna wan, sedemeke ji bo ku pêtir ziman û çanda her neteweyekê pêşde diçe û radeya hişyarbûna kurên wê newtewê di hemû warên jiyanê de bilind dibe. Rojnamenûsiyê di warê kultûrî, siyasî û civakî a gelan de rolekî pir mezin leyîstiye. Eger bizava rojnamenûsiya miletekî li pêş be, pêtir têgehiştin û şaristanîyetiya wî miletî nîşan dide. Îro cîhana pêşkeftî û medenî giringiyeke mezin bi warê pêşxistina rojnamenusî dide û mirovayetiya pêşkeftî rêz û hurmeteke baş ji bo rojnamenûsên emîn û dest û dil pakij digire. Rojnamenûsên berpirs û rast, ew pişmergên mêrxas in ku di refên pêşiyê de xebatê dikin û pir caran jiyana xwe dixine xeterê de ji bo ku rastiyan eşkere bikin, yan jî xizmeta gel, niştîman, ziman û çanda xwe bikin. Ji ber vê yekê jî rojnamevanên her miletekî li cem wî miletî xoşewîst in, û hemû rojnamevan li cem hemû mirovayetiya têgihîştî birêz in.

Rêyê bidin me, ku bibêjin; rojnamevanên kurd ji hemûyan pêtir he jî wê yekê ne ku miletê wan rêzê lê bigire, ji ber ku hêsanî em dikarîn bêjin ku rojnamevanên kurd ji bo pêşdebirina erkên xwe pir zehmet û azar dîtine.

Di demekî de ku em sed saliya derketina yekemîn rojnama kurdî bi bîr tînin û hurmeta me bo yekemîn rojnamevanê kurd Mîqdad Medhet Bedirxan heye, pir ji dil derketina sedemîn jimareya govara ROJA NÛ li xwe û li we û li gelê kurd pîroz dikin û ji rêvebirên govarê re pêtir serkeftinê dixwazin.

 

Hevbendîya Dêmokratî kurd li Surîyê, Rêxistina Swêd.

 

Hevalên hêja, redaksiyona ROJA NÛ!

 

Pir stêrk ji izmanê welatê me hatin rijandin!

Ji baxçê welatê me pirr gul hatin weşandin!

Lê ne stêr ji izmanê welatê me bi dawî tê

Û ne gul ji bexçê welatê me bi dawî tê!

 

ROJA NÛ guleke geş e, rehê xwe di civata kurdan de kûr berdaye.

Em bîst saliya ROJA NÛ li xwe û li we û li gelê kurd pîroz dikin.

Bila kovara ROJA NÛ ya hunerî, çandî û edebî her berdewam be di xizmeta çanda gelê me de!

 

Yûlîya Sehîd, ji navê redaksîyona rojnama Novîy Kurdîstan (Kurdistanî Nuwe), Moskow

 

Hevalên hêja, 20-salîya kovara ROJA NÛ pîroz bibe!

 

Beriya her tiştî zor sipas dikin ji bo dawetnama, ku we şandibû. Lê pir heyf, ku ji ber hinek sebebên xusûsî em nikarin bên. Hêvîdar im, ku hûnê li me biborin.

Li ser navê rojnama Kurdistanî Nuwe, ku bi zimanê rûsî çap dibe, em 20-saliya ROJA NÛ pîroz dikin û serkeftinê jê ra daxaz dikin. Di dîroka kovarekê da 20 sal ne hindik e û di van 20 salên borî da ROJA NÛ ji bo ziman, huner û çanda kurdî xebateke baş kiriye û cihekî xweyî giranbuha di nav çapemenîya kurdî da heye. Em hêvîdar in ku ewê vê xebata xwe di demên pêş da jî bi xurtî berdewam bike.

 

Yilmaz Çamlibel, serokê KÜRT-KAV-Weqfa Lêkolîn û Çanda Kurdî, Îstenbol

 

Birêz Haluk Öztürk, berpirsyarê kovara ROJA NÛ!

Kovara ROJA NÛ ev bîst sal e bo çand û hunera Kurdî xebateke bi rûmet dimeşîne. Ez bawerim ku ev xebatên giranbuha ji îro pê ve ê dom bikin.

Ez bi navê Weqfa Lêkolîn û Çanda Kurdî karbidest û xebatkarên ROJA NÛ bi dil û can pîroz dikim. Bila salvegera we ya bîstemîn bi xêr be, pîroz be. Ez bo we xweşî, serfirazî û serketinê dixwazim.

 

Mezhar Kara, şayîr-nivîskar

 

Di serê berî de, bîstsalîya ROJA NÛ bi dilgermîya rojên nû, rojên germ û ronî pîroz dikim.

Bi rastî min pir dixwast ku di şahîya salvegera ROJA NÛ de bi we re di govendê de çoş bibim. Lê pir mixabin, ku îro nikarim wê daxaza xwe bi cih bînim. Lê baş bizanibin, ku dilê min niha bi we re davêje.

Dibe ku îro li Stockholmê ne di nava we de bim, lê pir bi hêvî me ku emê di demek kin de li Amedê di şahiya weka şahiya salvegera ROJA NÛ de dest bi dest, mil bi mil, dil bi dil govendê bigerînin.

Ez ji hemû heval, hogir û beşdarên şahiyê re silavên xwe yên germ dişînim. Ji ROJA NÛ re gelek roj, sal û hejmarên nû û di xebatên we yên pîroz de serkeftinê dixwazim.

Bi rêz û silavên biratîyê.

 

 

Firat Cewerî, berpirsyarê kovara NÛDEMê

 

Bîst sal bi gotinê hêsan e!

Bîst sal bi gotinê hêsan e, lê bîst salên xebatê, bîst salên weşana bi kurdî û li ser kurdan ne karekî hêsan e. Jê re bawerî divê, fedekarî divê, înad divê, dûrbînî divê... Encama bîst salên ROJA NÛ nîşan dide, ku ev hemû jî li ba xebatkarên wê hene. Loma ew gihîştiye sed hejmarî û bîst saliya xwe. Bi raya min ev temendirêjî û baweriya bi armanc bawerîyekê jî dide kurdên hêvîçilmisî û dike ku hêvîya wan ya çilmisî geş bibe û ew jî di xebatên xwe de li temendirêjîyê bigerin.

Bi hêvîya ku wê ROJA NÛ di pêvajoya weşana xwe ya nû de bibe nûrojek, ez we hemûyan ji dil pîroz dikim û silavên xwe yên çêtirîn pêşkêş dikim.

 

Perwîna Cemîl Paşa, (seroka Buroya kurdî ya pêwendî û agahdarîyê li Brûksêlê)

û nivîskarê kurd Wezîrê Eşo

 

Hevalên hêja, redaktorê berpirsyar yê ROJA NÛ Haluk Öztürk!

 

Bi hinceta 20 saliya kovara we ya gelek hêja û hejmara wê ya 100 emîn, em bi germî we pîroz dikin û hêvî dikin ku di vê dema ku tê de pirsa kurdî gihîştiye merheleke nuh, hûn gavên xurttir bavêjin û bi vî awayî tevî xebatên kovar, rojname û rêxistinên din rûpelekî geş a dîroka kurdî vekin.

Tevî gelek silavên germ.

 

KOMCIWAN,

komîteya rêvebir

 

Ji komîteya pîrozkirina 20 saliya

ROJA NÛ û hejmara wê ya 100-î ra:

 

Em dizanin ku çand, huner, edebîyat û dîrok ji bo gelan gelek muhîm in. Ji bo me Kurdan pir daha muhîm e. Ji ber ku welatê me îro bin destê dijminan da ye û parçe-parçe ye. Ew dijminên koledar dixwazin her tiştên me winda bikin. Zimanê me qedexe kirine, çanda me qedexe kirine û dixwazin bi zorê bi çand û hunera xwe jî me asîmîle bikin û gelê Kurd nav dîrokê da winda bikin.

Hevalên birêz,

ROJA NÛ barekî giran girtîye ser milên xwe. Heya nika jî gelek ber xwe daye û îsal salvegera 20-emîn û hejmara xwe ya 100-î pîroz dike. ROJA NÛ kovareke edebî, hunerî û çandî ye û xwerû bi kurdî ye. Ev kar ji bo me ciwanên Kurd gelek bi hurmet e û têştekî çavdayînê ye. Em dizanin ku kurdî zimanê dayîka me ye û tîrêjên pêşeroja me ye. Ji bo wê yekê jî em gelek ji we ra sipas dikin.

 

KOMKAR-Danîmarka

 

Ji redaksîyona kovara ROJA NÛ ra!

 

Ji bona dawetnama we gelek sipas!

Bi rastî me jî gelek dixwast beşdarî şahîya ku we lidarxistîye bibana, lê çi heyf, ku bona vê yekê me mecal ne dît.

Wek KOMKAR-Danîmarka him ji bo20-salîya ROJA NÛ, him jî ji bo gihîştina hejmara wê ya sedî, em we bi dil û can pîroz dikin. Ji vir şûnda jî ji ROJA NÛ ra emrekî dirêj daxwaz dikin, herweha şahîya ku we ji bona vê minasebetê lidarxistîye, li gor dilê we û serfiraz derbaz bibe.

Hevalno, ROJA NÛ di warê çand, edeb û huner de di nav van 20 salên dawî de bi rastî jî roleke giring leyîst. Çi di nav rûpelên xwe da, çi di efrandinên weşanên xwe de, di gelek waran de li çand û hunera gelê me xwedî derket, tiştên di tarîyê da mabûn, tiştên di bîr û xeyalan de ne mabûn, derxist ronahîyê û ewana tevî xezna çanda gelê me kir.

Ji ber wan kar û xebatên giranbuha komela me KOMKAR-Danîmarka hemû kedkar û xebatkarên ROJA NÛ yên ji jimara yekemîn hetanî îro, herweha xwedî hemû nivîs û efrandinên weşanxana wê - yên îro bi we ra ne û yên ne bi we ra ne - hemûyan silav dikin. Di vê roja pîroz da em nivîskar û xebatkarên ROJA NÛ, şayirê gelê me seyda Cegerxwîn jî bi rêz û hurmet bi bîr tînin.

Bijî têkoşîna gelê me ya ji bo azadîyê.

Hertim tu hebî, ROJA NÛ!

 

 

KOMKAR-Hollanda.

 

Em bi navê KOMKAR-Hollanda salvegera kovara ROJA NÛ ya 20emîn û hejmara 100an pîroz dikin. Ji ber hinek astengan mixabin em nikarin beşdarê şahîya we bibin. Em serkeftina we dixwazin, silavên xwe yên welatparêzî pêşkêşî we dikin.

 

Partîya Demokrata Kurdistan (Bakur)-Komîta Swêd

 

Ji redaksîyona ROJA NÛ re:

 

Bi ROJA NÛ, ku 20 sal e hûn bi ked û hewldaneke mezin derdixin, hûn dîroka edebîyata kurdî dewlemendtir dikin. Ji bo vê xebata mezin em we pîroz dikin û ji we ra serkevtinê dixwazin.

 

 

 

Mustefa Aydogan, serokê Mala Çanda Kurdî

 

Hevalên hêja!

 

Îro ji bo tunekirina şertê heyîna me, bi saya îmkanên teknolojîya nuh ve û ji her aliyî ve hewildanên xurt û pirhêl di rojevê de ne. Êrîşên ku îro berên xwe dane çand û zimanê me, ji yên her demê dijwartir û bitesîrtir in. Pêlên asîmîlasîyoneke nedîtî bi ser me de tên û dixwazin me bi tevahî bidin ber xwe. Van pêlan berê xwe daye çand û zimanê me, şertê heyîna me.

Di vê pêvajoyê de, di warê parastin û pêşdebirina çand û zimên de, şiyarbûn û hewildaneke ku hêviyê bi mirov re çêdike jî xuya dibe. Lê ji bo em bikaribin li hember êrîşên asîmîlasyonê rawestin û wan bê tesîr bikin, bê şik xebatên xurttir û pirhêltir pêwîst in. Lêbixwedîderketineke bi bawerî û bi îstîqrar divê. Hevkarî û yekîtiyeke bi hêztir û firehtir divê.

Hevalno, îro pêwîstiya zimanê me ji her demê bêtir bi lêbixwedîderketinê heye. Divê bi kurdî peyivîn û nivîsîn bibe prensîpeke me ya jîyanê. Ev misogeriya berdewamî û jiyandina zimên e.

Kovar û rojnameyên me di vî warî de bi vê fonksiyonê û bi vê berpirsyariyê hewil didin. Bi kurdî derketina wan bi tenê jî hêjayî pesinandinê ye. Heta nuha di warê li kurdî bixwedîderketin û di her qada jiyanê de bi kurdî peyivîn û nivîsînê de roleke mezin leyîztine.

ROJA NÛ jî yek ji wan kovaran e, ku bi vê perspektîvê û bi vê rolê jiyana xwe ya weşanî didomîne. Bîst salên bê rawestan û jiyaneke weşanî ya berdewam û xwerû bi kurdîbûyina wê, ji aliyê hemû kurdan ve tê teqdîrkirin. Herweha di van bîst salan de, weşandina sed hejmarî jî xusûsîyeteke din dide ROJA NÛ.

Hêviya me ew e ku berdewamiya jiyana ROJA NÛ dê di warê paraztin û pêşdebirina çand û zimên de roleke xurttir bileyîze. Ez bi hêviya gelek bîst salên din û gelek sed hejmarên din, bîstsalî û sedhejmariya ROJA NÛ pîroz dikim û di jiyana wê ya pêşerojê de serkevtinê dixwazim.

 

 

Hemîd Kilicaslan, li ser navê kovara BERBANGê

 

Ji hêja berpirsiyarê ROJA NÛ û birêvebirên şevahenga pîrozkirinê re:

 

Salvegera 20-î û hejmara 100-î ya ROJA NÛ pîroz be! 20 sal û 100 hejmar di rêya vejandina zimên û xizmeta vejandina çanda gelê me de xebateke bê hempa ye. Rola zimên di bizava welatperweriyê de bingehîn e. Em hêvî dikin demên pêş bi çalakiyên werengî bixemilin û lehengên afirandina çand û zimên li asoyê tevgera niştimanperweriyê wek stêrikan ronahiyê li hev vedin. Serketin û serfirazî her para we be!

 

Hacî Kardoxî, Radîyoya Aştî, Dengê Komela Kurd ya Demokratîk û Kulturî li Stockholmê

 

Birêzan, desteya nivîsevanên kovara ROJA NÛ!

Dîrok pêş çavê me dike, ku ROJA NÛ çiqas xebateke berbiçav kiriye û karwanê xeta zêrîn gîhandiye vê qonaxê. Bo her kesekî seyr e ku ziman ji bo miletan heyberek sereke yê mukum e ku, civak li ser pêşve diçe. ROJA NÛ di jiyana xwe ya 20 salî da nîşanî me daye ku rolek çawa lîstîye. Em bi vê xebatê kêfxweşin û şanaziyê pê dikin. Em hêvîdarin ku, ROJA NÛ li hember nîrê mêtingehkariyê xebata xwe ya pîroz her berdewam bike û dê wek navê xwe yê pîroz civaka Kurdewariyê ronî bike û her zimanê Kurdî yê şêrîn pêşve bibe.

Bi silavên serkeftinê.

 

Loqman Polat, berpirsyarê kovara Helwest

 

Redaksiyona kovara HELWEST salvegera 20-emîn û 100 hejmara kovara ROJA NÛ bi dil û can pîroz dike.

Kovara ROJA NÛ di weşanvanîya kurdî de cihekî girîng digre. Di nav weşanên kurdî de kovara herî umirdirêj ROJA NÛ ye. ROJA NÛ ji bo pêşketina çand, ziman û edebîyata kurdî xizmetên gelek baş û hêja kiriye û wê xizmeta xwe hêj jî bidomîne. Em ji ROJA NÛ re jîyaneke dirêj û serketinê dixwazin.

 

Zeynalabidîn Zinar, serwêrê weşanxana PENCÎNAR

Pîrozname

Ez bi dil û can bîstsalîya ROJA NÛ pîroz dikim û hêvîdar im ku dê kovar gelek bîst salên din jî bijî.

 

Xelîl Dihokî, serokê Komela Nivîskarên Kurd li Swêd

 

Ji redaksiyona ROJA NÛ re

 

Gotineke Çekîya heye, dibêje:

"Netewa ku zimanê wî tunebe, ew jî tune ye".

Ji lewra jî, rijêma Tirkîyê di 3 adara sala 1924-a de ziman û kultura kurdî qedexe kir û heta niha jî hemî dergeh li ber girtine û bi gişt hêzên xwe rê li gelê kurd digre û nahêle bi hêsanî bigehê bajarvaniyê. Lê berovajî pîlanên tevaya rijêmên genî yên Tirkîyê gelê me xwe ragirtiye û nexşên wan têkdayîne û şikandîne.

Belê, rewşenbîr, nivîskar û hişyarên gelê kurd giringiya hêza ziman û kulturê dizanin. Ji lewra jî nemir Mîqdad Bedir-Xanî di sala 1898-a de rojnama Kurdistan derêxist û paşê, zana û têkoşerê nemir Celadet Bedir-Xanî jî kovarên Hawar û Ronahî weşandin. Ew di nivîseke xwe de giringiya zimanî destnîşan dike û dibêje: "Hon ko ji bo hînbûna zimanê biyaniyan bi salan ve xebitîne û îro jî dixebitin. Kuro eyb e, şerm e, fehît e, an hînî zimanê xwe bibin, an mebêjin em kurd in. Bê ziman kurdîtî ji we re ne tu rûmet e, ji me re rûreşîke giran e".

Belê, serokatî û kadroyên PSK jî giringî û pêwîstiya weşanên kurdî dizanî, lewra wan jî di sala 1978-a de li welatê Swêd kovara ROJA NÛ weşandin û qonaxên sext derbaz kirin. Kovarê ji destpêkê barekî giran daye ser milên xwe û kar û xebateke mezin ji bo gelê kurd kiriye û ew jî cihê şanazî û serbilindiya xelkê me ye. Belê, vê têkoşîn û berdewambûna 20 salên pir asteng û giriftariyên çap û belavkirinê ji aliyekê xelkê me hişyar kiriye, qulaçeka pirtûkxana kurdî xemilandiye û ji aliyekê din jî çavên dijminan teqandîye û pîlanên wan serûbin kiriye. Ji xwe Napoleon gotiye:

"Ez ji hezaran tank û leşkeran natirsim, lê ji gotareke rojnaman ditirsim û dibehitim".

Di dawiyê de em ji dil û can 20 saliya kovara ROJA NÛ û derketina hejmara wê ya 100-î pîroz dikin û serketinê ji bo redaksiyona wê dixwazin.

Her bijîn ji bo xizmet û pêşxistina ziman, huner, edeb û rewşenbîriya kurdî... Bi rastî jî parastina zimanê kurdî şoreşek e.

 

 

Alî Çîftçî -serwêrê weşanxana APECê

 

Ji redaksiyona ROJA NÛ re!

 

Di nav kovar û rojnameyên ku tenê bi kurdî derdikevin, kêm kovar û rojname hene ku karibûne, bêy ku navbên bidinê, weşana xwe bidomînin. Kovara ROJA NÛ yek ji wan kovaran e, ku karibûye weşana xwe heta roja îro berdewam bike. Kovareke ku 20 sal in di xizmeta wêjeya kurdî de ye, hêjayî pîrozkirina 20 salîyê ye. Her çiqas 20 salên xwe, wek me, li derveyî welêt derbas kiribe jî, xizmeteke mezin daye edebiyeta kurdî. Hêvîya me hemûyan jî ev e, ku rojekê ev jî dê li Kurdistaneke azad de weşangerîyeke bi azadî bimeşîne.

Ez li vir li ser navê weşanxaneya APECê, ji xebatkar û redaksiyona ROJA NÛ re serkeftinê dixwazim û 20 saliya ROJA NÛ pîroz dikim.