Kirmanckî – Zazakî ziwanê panc mîlyonî yo?
Wî Homa! Wî Xizir! Wî Heqo!
Eke no nufus yêno aqilê mi, sarreyê xo kena mabênê di destanê xo, çimanê xo ver bi verê xo derg kena, sarreyê mi zingeno, sas û mat bena, manena.
Giran bi giran sarreyê xo berz kena, qayîtê rojnameyan, kêyepelgan, kitaban, nusneyan, nusnoxan kena ke çi bivênî?
Nê panc mîlyonî ra, e yê ke Kirmanckî nusnneê, wanenê, zanenê,’panc kesî’ ya estê, ya çîn ê! Nê ‘panc kesî zî’!Hewayê xo der ê, tayîne zî, bi quretîye ‘ez zanena-ez zanena’! Vanê, tik û tenya manenê.
Xeylî waxto ke mi romanê xo yê neweyî nusno, henî sey ‘bêkes, sey sewî’ dosyayê mi der o.
Ne yewo xêyrin, ne yewo xêyraz nêvecîya ke, no roman çap bibo!
Emeg dana, ser o zî pere dana, la no roman hîna vinete yo.
Kes mi ra ‘pila-pile’ mekero, ‘ma pêro pîya ‘panc kesimê juminî nas kenîme’!
No, halêde xirab o, wa vindo, la eke Zaf kesi bi Tirkî nusnenê vanê ‘dilimize sahib çikalim’ seytan vano bibe Dinya, înan ser o dêmdîye.
Wa kes qayîtê qusirî mekero! Tayê kesê ke qaso bi zonê ma ra nusnenê, ê zî ‘formalîte ra’ nusnenê. Tayê ke zonê ma ra nusnayî, gêrenê ra Tirkî nusnenê. Ez sima ra reyêna vajî; romanê mi ‘SOSINE Û GULÎZARE’ ra eleqedaro ke mi pawitêne nêdî û nê halî mi zaf da fikirnayene. Bê birêz îsmaîl besîkcî qet yew kesê ke qaso ziwanê ma ra eleqedar ê, ne qal kerd, ne nîrxna, ne rexne kerd. Birêz îsmaîl Besikcî yo ke bi xo kirmanckî nêzaneno, la hesasîyetê xo ra qal kerd.
Qey kesî qal nêkerd? Çi ke nêwendê, nêwanenê.
Ziwanê ma, ê panc mîlyonî yo gelo?
Wî Homa! wî Xizir! wî heqo!
No çi hal bî sima ardo ra ma ser o?
Sima kotî der ê, wendox û nusnoxê Kirmanckî-Zazakî?
Yew kes mi ra vajo ‘ti hewn vênena, ziwanê ma, ê panc mîlyonî nîyo’!
Ya mi nê hewnî de hasar bikerê, ya zî ‘çare bivênê, mi raxelesnê’!
Gelo no hewn o ez vênena henî nîyo?
Vajê ‘rast o, ti hewn vênena, ziwanê ma ê panc mîlyonî nîyo’!
Eke no panc mîlyon nîya rehet o, o waxt pepug tenya mi ra biwano!
19-3-2015
Ilhami Sertkaya