Axaftina nûnerê Komîteya HEVKARÎ ya Hêzên Siyasî yên Kurdistanê:

Gelî mêvanên ezîz
Xûşk û birayên hêja!

Ez li ser navê Komîta Hevkariya Hêzên Siyasî yên Kurd û Kurdistanî xêrhatineke germ li we hemûyan dikim û ji boy bîranîna serokê nemir Mele Mistefa Barzanî gotarekê pêşkêş dikim.

Gelî xûşk û birayan!

Di bîranîna sedsaliya jidayikbûna têkoşerê mezin, Mele Mistefa Barzanî yê nemir da, em wî bi rêz û hurmet bi bîr tînin û li ber yada wî serê xwe ditewînin.

Îro, dema em li vir, salvegera sedemîn ya jidayikbûna têkoşerê mezin, serokê nemir Barzanî pîroz dikin, weku kurd, li ba me hemûyan hestên serbilindî, dilxweşî û bextewariyê geş bûne. Ji ber ku, em kesên ku îro ji bo yadkirina vê roja pîroz li vê salonê amade ne, baş dizanin, ku Barzanî, ji bo miletê me çi zehmetî û dijwarîyên mezin kişandine. Û ji ber ku, em dibînin, ew ked û xebata wî ya bi dehên salan, encamên xwe îro pêşkêşî xebata avadankirina welat, saxlemkirina stûnên azadiyê û bihêzkirina sengerên parastina miletê me û welatê me dike.

Barzanî di destpêka sedsala buhurî da hat ser rûyê dinyayê. Ew sedsal ji bo miletê kurd, sedsala şer û berxwedanên azadiyê ye. Di nav wê sedsalê da miletê kurd bi dehan car li dijî dewletên zordest û dagirker serîhildan û raperîn kirin. Hema bêje di hemû serhildinan da çi weku piştpal çi jî weku pêşeng, ked û xebata Barzanî heye. Li Silêmaniyê ji Şêx Mehmûd Berzencî ra, di Serhildana Agirî da, ji Ihsan Nûrî Paşa û hevalên wî ra, li Mehabadê ji Qazî Mihemmed ra dibe alîkar.

Miletê kurd, bi gelek ketin û rabûnan ew sedsal derbas kir û di rêya azadî û rizgariyê da bi sedhezaran şehîd dan. Lê bizava azadîxwaz ya miletê kurd, hîç wextekê nesekinî. Di berdewamiya şerê azadiya miletê kurd da, tevgera Barzanîyê nemir xwediyê roleke sereke ye. Barzanî, bi têkoşîna xwe ya bêwestan, bi rik û inyat, li hember dijwariyên piralî û sext rawestiya, hêviya miletê kurd hertim bilind kir. Barzanî bi pêşmergeyên xwe ve di demên here reş û tarî de dibû wek ronahiyeke geş, rê nîşanî neteweyê kurd dida. Her raperineke Barzanî bi xwe re li seranserî Kurdistanê hestên welatparêziyê diweşand. Bi taybetî Şoreşa Îlona sala 1961ê, di çêkirin û belavkirina hestê neteweyî da roleke pir mezin leyîst. Bi vê şoreşa rizgariya neteweyî, navê miletê kurd û rêberê nemir, qehramanê neteweyî Barzanî li seranserî cîhanê belav bû.

Geli xûşk û birayên hêja,
Mêvanên giranbiha!

Barzanî xwediyê gelek xusûsiyetên hêja û bilind e. Çi wek partizan, çi jî wek siyasetmedar û diplomat… Bêguman behskirina wî bi layîqî di gotareke kurt da ne mumkun e,lê dîsan jî ciyê pêwîstîyê ye ku, em çend rêçikên esasî, yên Barzaniyê nemir bînin bîra xwe:

Wî digot: "Em miletekî mazlûm in, şerê man nemanê dikin. Ki bixwaze alîkariya miletê me bike em nabêjin na.
Wî digot: "Kurd û ereb bira ne, lê gereke bira biqasî hev xwedimaf bin"
Wî digot: "Em azdiya xwe di nav sînorê Iraqeke demokratîk da dixwazin"

Belê, Barzanî bi siyaseteke realist û rastbîn kir ku:
-dewleta Iraqê mecbûr bû pê re peymanan îmze bike;
-welatên ereban nexeyidand û ji xwe re nekir dijmin;
-di nav şerê sar yê navbera herdu şeqên dinyayê de şoreşa kurd kanibû bi salan nefesê hilde;
-xetera êrişeke ji bakur ango ji ali dewleta tirk ve berteref kir.

Barzanî li hember dijminên miletê kurd hişk û bêtavîz bû, li hember însanan, dîn, mezheb û hûrgelan, bi biratî, tolerans û xweşbînî bû.

Hemû ev tiştana îro jî pêwîst in di siyaseta rasteqîn ya miletê kurd da. Ew, rê nîşanî rêber û siyasetmedarên me yên roja îro didin. Di wan da gelek dersên hêja hene ku em hemû dikarin jê sûdê wergirin.

Gelî xûşk û brayên delal!

Van rojana çavê hemû dinyayê, bala hemû insaniyetê li ser wê cografyayê ye ku welatê me jî lê ye. Dinya, Seddam, çek û sîlahên Saddam, xeterbûna Saddam û şerekî li dij Saddam qise dike. Lê Saddam ne ji îro ve xwediyê aparateke eskerî ya xurt e. Ew aparat par û pêrar nehatiye avakirin, ji mêjda ye miletê kurd li hember wê aparata mezin şer kirîye û dike. Aha di vê pirsê da jî careke din xurtbûna têkoşeriya miletê kurd û Barzanîyê nemir tê ber çavan.

Di nav deh salên dawî da, miletê me li Kurdistana Iraqê biharekê dijî. Ihtimalen şerekî mezin wê li dijî rejima Saddam dest bê bike. Di vê navberê re dijmin û neyarên sondxwarî yên miletê kurd, çavên xirab û kem berdana bihara kurdan, dixwazin wê xirab bikin. Ew ji guhartina statikoya li herêmê gelekî ditirsin. Ango ew ji azadiya miletê kurd re tehamûl nakin. Hukûmeta tirk tehdîda dagirkirina Kurdistana Iraqê dike. Le belê, ew ji bîr dikin ku, miletê kurd destkevtiyên xwe yên neteweyî, wisa bi hêsanî dest xelqê ve bernadin. Bila kes hisabên şaş meke!

Xûşk û birayên hêja!

Di vê roja pîroz da, hêja ye em bêjin, weku netewe, ji bo me, pêşkevtineke giring, momenteke nû û hêja jî ew e ku hêzên siyasî yên miletê me, van rojana serweriyeke navendî pêk anîne. Ev gava pîroz, bi daxwaz û ramanên Barzaniyê nemir re sedî sed diguncire. Em bi hêvî û baweriyeke xurt silavê li vê pêşketinê dikin. Bila ew li miletê kurd pîroz be.

Em careke dî bi rêz û hurmet serok Mele Mistefa Barzanî bibîr tînin û bila ev roja mezin li hemû miletê kurd pîroz be!

Spas ji bo we guhdarî kir!…

***