Axaftina serokê FKKSê Keya Îzol :

"Barzanî, bi tekosîna xwe ya nîv asirî di dilên hemû kurdan de cihekî taybetî tije dike"

Îsal gava em ji bo bîranîna 100 salîya serokê netewî Mistefa Barzanî li vir civîyane beşek ji welatê me, Kurdistana Iraqê, bi hemû alîyên xwe ve di rojeva dinyayê de ye. Li Iraqê şer dibe yan na û pêşerojê Iraqê wê çawa be, bûye pirsên hemû dewletên dinyayê û herweha pirseke ji bo mirovatîyê.

Barzanî, bi tekoşîna xwe ya nîv asirî di dilên hemû kurdan de cihekî taybetî tije dike. Gava behsa Barzanî dibe, têkoşîna gelê Kurdistanê tê bîra me, û gava behsa tekoşîna Kurdan tê rojevê Barzanî tê bîra mirovan. Ew hem serok û hem jî pêşmerge bû. Dîrokî bûyina Berzanî ji ber van xususîyetên wî tên. Barzanî bi raman, fêdakarî û têkoşîna xwe dema di jîyanê de û piştî kû ji nav me koç jî kir, bûye sembola tekoşînê gelê Kurdistanê.

Mixabin tekoşîna wî ya bêhempa fêkîyên xwe dikaribû 13 sal piştî wefata wî bide. Xewn û xeyalên Berzanî bi saya hemû xebat û fedakarîyên wî û bi hezeran xwîna şehîdên bênav, xeyala Kurdistaneke azad, îro 12 sal in di ber çavên gelê me, di ber çavên dost û dijminên me, bûye rastîyekî dîrokî û herî girîng ev rastîya ji alîyê 40 milyon kurdên hemû perçeyên Kurdistanê tê piştgirî kirin û parastin.

Îro fêkîyên ku Barzanî û bi hezaran şehîdên bênav pêşkeşî neteweyê xwe kirin wek xelatek giranbiha, wek zarokek azadîyê di destê me kurdan de bi her awayî wê bê parastin û bê mezin kirin. Tu quwet yan tu dewlet wê nikaribe dest dirêjî wê bike. Çawa destxistina wê bi xwîn hatiye pejirandin wê parastina wê jî eger pêwîst be, bi xwîn were parastin.

Îro gava em dibînin ku dewletên dagîrker, bi taybetî Tirkiye çawa li hember azadîya kurdên Başûr nerehetîya xwe, bi awayekî eşkere nîşan dide, divê em bi serehat dilgerm bin ji ber ku nerehetîbûna wan herweha teyîd dike ku em wek netewe di rêyeke rast de dimeşin. Ew rêya rast ku serokê nemir Berzanî nîşanê me dabû. Herweha êrîşên dewletên dagîrker divê mesajeke din î girîng bîne bîra me. Em wek netewe îro di nav pêwendîyeke çawa de ne ? Çi erk û wazîfeyên acîl di ber me de ye? Em çawa dikarin îcar ji van bûyeran azadîyeke têkûz derbixin? Bêguman van rojên dîrokî de erk û wacibên me du-sê qat bûne. Îro roj roja man û neman e. Yan em jî wek her miletek, çawa bi hev re, mil bi mil serê millî kirin, xwe ji bin nîrên kolonyalîstan xilas kirin, em jî hemû bi hev re, hêzên xwe ji bo hedefekî yek bikin.

Roj roja xebat û fedekarîyê ye. Çawa serokê nemir Berzanî û sedhezaran pêsmergeyên bênav ji bo rêya welat de giyanî xwe yên pak fîda kirin divê em jî ji bo parastina wan nirxên hêja xwe amade bikin.

Bila ruhê Berzanî nemir sad be ji ber ku nifşên nûh soz û peyman dikin ku wê dîyarîya herî giranbiha ku ji wî teslîm girtine, wê bi her awayî biparêzin.